Sisimiut

Sisimiuni qimmit affaannanngorput

Sisimiuni qimussertartut peqatigiiffiat Qimusseq kajumissaarivoq qimmit qimuttut illersorneqarnerunissaanik oqallinnissamut. Kisitsisit takukkit

Qimmit Sisimiuni ikiliartupiloornerat qimussertartut peqatigiiffiata Qimussip ernumanartoqartippaa

Sisimiuni qimmit qimuttut amerlassusaat ukiut qulit kingulliit ingerlaneranni affaannanngorsimavoq. Qeqqata Kommuniata nalunaaruinerata nutaap tamanna takutippaa. Qimussertartut peqatigiiffiat Qimusseq qimmit qimuttut siunissaat pillugu ernummaammeqqavoq qimussertarnerullu illersugaanerunissaata oqallisiginissaanut kaammattuilluni.

Nunakkut qamutit motorillit atugaanerat pillugu kommunep maleruaqqusassaa pillugu Qeqqata Kommunia tusarniaaqqammerpoq. Qimussermi siulersuisut isumaqarput qamuteralaat atugaanerulerpata qimussertarnerup tatineqariartornera suli sakkortunerulissasoq.

Sisimiuni qimmit qimuttut 2003-mi nalunaarsorneqarmata 1.905-upput. Maanna qimmit qimuttut 998-iinnanngorsimasut Qeqqata Kommuniata 2013-mut nalunaarsuinerani takuneqarsinnaavoq.

Taamaattumik Qimussermi siulersuisut akerliupput Kangerluarsuk tulleq avannaqqullugu qamutit motorillit ingerlaarsinnaalernissaat akuersissutiginiarneqarmat.

- Tamanna ulluinnarlugu qimussertartut asimi nipaatsumi qamuteralannit qanittumit ungasissumillu nipiliorfigineqaratik ulluinnarlugu ornissinnaasatuaraat, Qimusseq kommunep ileqqoreqqusassaanut akerliunni oqaaseqaammini allappoq.

Aammattaaq Sisimiut Kangerlussuullu akornanni qimussit aqqutaanni Amitsorsuup avannaani Tasersuarmi qamutit motorillit ingerlaarfeqalernissaat akueriniarneqarpoq. Qimussermi siulersuisut aarleqqutigaat tamanna pissutigalugu sumiiffimmi tamaani qimussimik tikikkuminaatsumi piniagassat suli ungavarnerunissaat.

Qimmit amerlassusaata nalunaarsorneqarsimaffiat uani takuuk

Powered by Labrador CMS