Sisimiuni politiit: Quit naqqullu atai ujaasiffigisigit
69-inik ukiulik Pauline Kleist Sisimiuni politiinit suli ujaarineqarpoq. Kajumissutsiminnik ujaasisut sisamanngornermi unnukkut ujaaseqatigiimmata nassaarineqarsimanngilaq.
Sisimiut Politiivisa Pauline Kleist 69-inik ukioqartoq suli ujaaraat. Taanna marlunngornermi 19. januar 2021 ualikkut nalunaaqutaq 15.00 missaani kingullermik takuneqarpoq aqqusinikkut Deichmannip Aqq.-tigut pisuttoq.
- Sisimiut politiivisa innuttaasut kaammattorpai quiminni, pilivimminni, naqqup-ataani, umiatsiani, containerini allanilu misissueqqullugit.
Pauline Kleist, 69-inik ukiulik ima taaneqarpoq:
- Arnaq kalaaleq
- 69-inik ukiulik
- 150 cm missaani angitigaaq, timaa nalinginnaasumik sananeqaateqarluni
- Nujai qeersaalersimasut tuianut killipput
- Kingullermik takuneqarami qernertumik nasaasartaatigut meqquluaasartalimmik "Polar"-imik meqqilimmik kavaajaqartoq, qernertunillu qarleqartoq takuneqarpoq.
Ujaasisut qutsavigai
Sisamanngornermi unnukkut nalunaaqutaq 19.30 kajumissutsiminnik ujaasiniartut 100-t missaat Sisimiuni naapipput eqimattanullu arlalinnut agguarlutik. Illoqarfik tamakkivillugu ujaasiffigineqarpoq.
- Ujaasineq sivisuvoq. Kajumissutsiminnik ujaasisut qaammartartulisarput, aqquserngillu tamaasa ujaasiffigalugit. Aamma biilit arlallit illoqarfiup iluani ingerlaarput ujaaseqataallutik, Karl-Jørgen Lennert, Sisimiut Politiini politikommissær Sermitsiaq.AG-mut oqaluttuarpoq.
Ujaasisut arnaq ujaarineqartoq nassaarinngilaat, kajumissutsiminnilli ujaasisut iliuuseqarnerannut politiit qujapput.
- Kajumissutsiminnik ujaasisut, snescooterertartut, SAR-imi kajumissutsiminnik peqataasut ujaasinermi suliarujussuinut politiit qujapput, Sisimiut Politiivi tusagassiorfinnut nalunaarutiminni allapput.
Sisimiut Politiivisa arnap ujaarineqartup qanoq innera ernummatigaat, taamaattumillu attaveqarfigerusullugu. Takunnissimasinnaasut arnalluunniit sumiinneranik ilisimannissinnaasut politiinut attaveqaqquneqarput uunga sianerlutik 701322.