Sisimiuni pisuttuartartunut nutaamik festivalertitsisoqartalissasoq

Pisuttuartartut Sisimiuni aasakkut aaqqissuussiffigineqartalissapput, imatut taaguutilimmik: Arctic Hiking Festival

Sisimiuni assigiinngitsutigut suliniuteqarluartoqartarpoq, maanna innuttaasut takornariallu timigissarnermik nuannarisallit qilanaaruteqarsinnaanngorput. Arctic Circle Racep aamma Arctic Sloundsip saniatigut festivali nutaaq sapaatip akunnerani 30-mi ingerlanneqartussanngorpoq: Arctic Hiking Festival.

- Festivali ukiut tamaasa pisartussatut eqqarsaataasoq Arctic Circle Trailimut malitsitut atuuttussaq Kalaallit Nunaanni pisuttuartarfiussaaq, festivalimik pilersitseqataasoq Sisse Bang oqaluttuarpoq.

Piujuartitsineq

Piujuartitsineq ukioq manna hiking festivalertitsinermi qitiutillugu sammineqassaaq, WWF-imilu siunnersortaaneq Mette Frost aamma Aarhus Universitetimi siunnersortaaneq Lis Bach tamanna pillugu oqaloqatigineqalereerput.

Festivali marlunngornermi unnukkut tikilluaqqusinermik aallarnerneqassaaq, arfininngorpallu ikumatitaqarnermik sikatsitanik (BBQ) nerisitsinermik nipilersornermillu naggaserneqassalluni. Sapaatip akunnerata ingerlanerani pisuttuarfissat assigiinngitsut 24-t sammisassanik arfinilinnik imallit toqqarneqarsinnaassapput, sammisassat tamarmik piujuartitsinermik, misigisimasanik ikinngutitaartarnermullu attuumassuteqassapput.

Ataatsimuualaarnissaq pingaartilluinnarneqartoq

- Sammisaqarluni ataatsimuualaarnissaq festivalimi qitiutitassatut pingaartinneqartut ilagaat, Anette Lings aamma pilersitseqataasoq oqaluttuarpoq.

- Arctic Circle Racertitsisarnermi aamma Arctic Soundsertitsisarnermi misilittakkatta takutippaat, najukkami innuttaasut nunanillu allaneersut naapikkaagata tupinnaannartumik ataqatigittoqalersartoq, Annette Lings Hotel Sisimkiuni ulluinnarni pisortaq, festivalip allattoqarfianik aqutsisuusoq nangilluni oqaluttuarpoq.

Powered by Labrador CMS