Sisimiut

Sisimiuni pisiniarfimmi ujajaasoqareersoq politiit takunnissimasussarsiorput

Brugseneeraq Kussangasumi angut ujajaammat 17.000 koruuninik tillippoq sisamanngornerup unnukkuani

Sisimiuni Bolethep Aqqusernani angut Brugseneeraq Kussangasumi ujajaagami 17.000 koruunit tiguai sisamanngornerup unnukkuani.

Ujajaasoqarneranik politiit nalunaarfigineqarput nalunaaqutaq 23.52. Politiit ilisimatinneqarput ujajaasoq sulisut isertarfiatigut isersimasoq tassanilu pisiniarfiup aningaasanik toqqorsisarfia ammaqqusimallugu. 17.000 koruunit tigoriarlugit angut qimaavoq.

Ujajaasoq sumuup tungaanut qimaasimanersoq ilisimaneqanngitsoq Qeqqata Politiivini pisortaq Johan Davidsen oqarpoq.

Sisimiormiusut oqaluttoq
Ujajaasoq ima isikkulittut nassuiarneqarpoq: angut, 175 centimeterit missaannik angissusilik, nukeqarluartoq, qorsorpaluttunik isilik, aappaluttumik maskilik, qernertumik kavaajalik, qasertunik Nike-nik joggingilik qenertunillu 'Nike'-nik kamippalik. Aamma Sisimiormiusut oqaluppoq.

Taamaammat Sisimiuni politiit takunnissimasussarsiorput, imaluunniit ujajaasoqarneranut atatillugu ilisimasallit politiinut saaffiginneqquneqarput. Sisimiuni politiit oqarasuaataat ima normoqarpoq: 70 13 22.

Powered by Labrador CMS