suliffiit
Sisimiuni nutaanik tunitsiviliornissamut kommuni akuersivoq
Ingerlatseqatigiiffiit marluk Sisimiut talittarfiani tunitsiviliornissaminnik soqutiginnissimapput.
Sisimiuni talittarfimmi tunitsiviliornissamik sanaartornissamut qinnuteqartunit ingerlatseqatigiiffiit marluusunit aappaa Polar Seafoodiuvoq.
Polar Seafoodimi siulersuisuni siulittaasoq, Henrik Leth, ingerlatseqatigiiffiup piffissami aggersumi pilersaarutit piviusunngortinnissaanut tunngavissaqarnersoq paasinarsissagaa ilisimatitsivoq.
- Suli isumaliutersuuteqarluta inissisimavugut, suliniutillu naammassinissaanut sulia aalajangiusimavinngilagut, taamaattumik suliniut oqaaseqarfigissallugu siusippallaarpoq. Qaammatini tulliuttuni aalajangisssalluta naatsorsuutigaarput, Henrik Leth Sermitsiaq.AG-mut oqarpoq.
Atuaruk: KANUKOKA: Suliffiit sinerissamut nuunneqarlik
Polar Seafood aamma 66.56° North, qinnuteqartut aappaa, kommunip talittarfiani Qeqqata Kommunianut 50 millionit koruuninik aningaasartuutaasimasumut inissinneqarnissaat kommunimit kissaatigineqarpoq.
Aalisarneq takornariaqarnermit salliullugu
Talittarfik ullumikkut containerinut inissiivittut aamma aasaanerani takornarissanut tuniniaavittut atorneqartarpoq. Tamannali kisianni isertitaqarfiuallaanngilaq, kommunimi politikerit tunitsiviliornissamut qinnuteqaatit suliarineqarneranni naqissusiipput.
- Kommunip talittarfiani tunitsivinnik marlunnik pilersitsisoqarpat, kommuni toqqaannanngikkaluartumik aalisakkerisoqarnerulerneratigut akileraarutitigut isertitatigut annerusunik aningaasatigut isaatitsisinnaalissaaq, ataatsimiinnerup imaqarniliorneqarnerani atuarneqarsinnaavoq.
Atuaruk: Namminersorlutik Oqartussat suliffeqarfiit ukiormanna sinerissamut nuunnianngilaat
Taamaattumik suliffeqarfiit pilersaarutitik ingerlateqqissappatigit kommuni akuersaarpoq.
- Aalisartut pisaminnit aningaasatigut isaatitsinerulernissaannut tunitsivissat iluaqutsiissapput, soorluttaaq tunitsiviit Qeqqata Kommuniani suliffinnik nutaanik pilersitsissasut, taamaalillunilu aningaasaqarnikkut atuilluartoqassalluni. Tunitsiviit aamma umiarsualivimmi nunatanik atuilluarnerunermik kinguneqassapput, taamaalillunilu umiarsualivimmi pisortat aningaasaliinerat atorluarneqarnerunissaat qulakkeerneqassalluni, politikerit inerniliipput.
Ingerlatseqatigiiffiit marluk kissaatigippassuk, sanaartorneq 2017-imi upernaakkut aallartinneqarsinnaavoq.