Sisimiuni nipilersortoqarpoq
Arctic Sounds Festeval aaqqissuunneqartalerneraniit maannamut annersaringallagaat Sisimiuni aallartinneqaqqammerpoq påskillu aappaata tungaanut ingerlanneqassaaq.
Nipilersortartut assigiinngitsorpassuit soorlu Kusernerit, Ole Kristiansen, Small Time Giants, Greta Svabo Bech allarpassuillu Norgemiit, Sverigemiit, Qallunaat Nunaanniit kiisalu Canadamiit nipilersortoralugit nipilersoriaatsit assigiinngitsorpassuit tusarnaariarneqarsinnaapput.
Nipilersortartut, nipilerisut attaveqaatillu katillugit 95-it Sisimiunukarsimapput.
Unnugu Kalaallit Nunaanni nipilersortartoq ilisimaneqarluartoq Ole Kristiansen appisimaassaaq. Taassuma Small Time Giantsikkut paarlassavai.
Nunani avannarlerni suleqatigiinneq
Arctic Sounds nunat avannarliit festivalimik aaqqissuisartut suleqatigisimavaat, tassani inuusuttut nipilersornermik piginnaanillit avitseqatigiiffigineqarsimallutik. Ilaatigut Qallunaat Nunaanniit Kogekunst tikisinneqarsimapput taakku Aalborgiminngaanneersut noisey-mit qallunaani nipilersullaqqinnerpaatut oqaatigisimavaat.
Pilersaarut takujuk
- Nunani avannarlerni festivalimik aaqqissuisartut suleqatiginerisigut ukioq manna Arctic Sounds pisarnerminiit annertuneruvoq, Arctic Sounds oqaaseqartartua Nuka Alice Lund oqarpoq.
Taassuma nassuiaatigaa, festivalip aallartinngilaattaa ilaatigut PIP (Piorsarsimassutsikkut Inuusuttunut Peqatigiiffik) suleqatigalugu inuusuttunut nipilersornerup tungaatigut workshop-imik ingerlatsisoqarsimasoq.
Naligiissitsineq
Nunat tamalaat akornanni festivalimik aaqqissuisartut naligiissitaanissamik suliniutaat - Keychange pledge – festivalertoqarnerani arnat angutillu amerlaqqatigiinnissaaq Arctic Soundsimit aamma malinneqarpoq.