Sisimiuni nipilersornermik festivaleqarnissaa marloriaammik anginerulerpoq

Sisimiuni nipilersornermik festivalertitsisut, Arctic Sounds, Islandimi nipilersornermik aaqqissuisartut, Iceland Airwavesip, assinganik iliuuseqarusupput, tassa soqutiginartumik nipilersornermik festivalertitserusupput.

Tamanna iluatsilluarsimagunarpoq, tassami kingullermi festivalertoqarneranit nipilersortussat marloriaatinngorsimapput, nipilersortartut 50-it nipilersortussanngoramik.

Sisimiuni nipilersornissaq soqutigineqartoq
- Nipilersortartut namminneerlutik saaffiginnittartut amerlatsikkiartuinnavipput, aaqqissuisoq Jacob Froberg oqarpoq. Nipilersornermik ilinniarfimmi aamma pisortaavoq.

- Tusarnaariartussat soqutiginnilluarput, tassami nipilersortartut ilisimaneqarpianngitsut aamma ilisimaneqarluartut nipilersortussaapput. Aamma nunanit allaneersunit tikittoqassaaq nipilersoriartunik. Aamma workshoppertitsisarpugut nipilersortartunut, tassani nipilersortartut namminneerlutik ineriartortitseqatigiittarput, oqarpoq.

Sisimiuni nipilersornermik festivali Arctic Sounds ullumi sisamanngornermi aallartissaaq.

Aningaasaliisunngortut
Angallassiniarneq pissutaalluni festivalertitsisoqarnissaa akitsungaatsiarpoq.

- Grønlands Rejsebureau suleqatigilerparput, suliffeqarfik pissutaalluni nipilersortartorpassuit assigiinngitsut tikissapput, Jacob Froberg oqarpoq.