peqqinnissaq
Sisimiuni napparsimasut naammagittaalliorput
Astma-mik, bronkitis-imik sapigaqarnermillu nappaatillit katsorsarneqarnissamik pisinnaatitaaffitik ilisimanngilaat
Siumut tunuliaqutaralugu Inatsisartunut ilaasortap Evelyn Fredereiksenip paaserusuppa astma-mik, bronkitisimik sapigaqarnermillu nappaatillit Peqqinnissaqarfimmi sunik pisinnaatitaaffeqarnersut.
Taanna paragraf 37 naapertorlugu Naalakersuisunut apeqquteqarpoq.
Tamatumunnga pissutaavoq Sisimiuni napparsimasut 345-t Peqqinnissaqarfiup astmartunik, bronkitisertunik sapigalinnillu katsorsaanera pillugu naammagittaalliorsimanerat. Evelyn Frederiksenip paaserusuppaa naammagittaalliuutit qanoq qisuariarfigineqarsimanersut.
Evelyn Frederiksen allappoq: "Innuttaasut atsiornernik katersillutik maalaaruteqarlutik peqqinnissamut Naalakkersuisumut tunniussipput, tamanna Naalakkersuisut qanoq iliuseqarfigaat, qanorlu qisuariartoqarpa? Innuttaasut sullinneqarnermikkut periarfissaat erseqqissumik ilisimaarineqarnerat qulakkeerusullugu kiisalu aasaanerani sapigallit aammalu ataavartumik sapigallit anersaartorniarnermikkullu sapigallit periarfissaat qanoq innersut qulaajarusullugit innuttaasunut erseqqissumik takuneqarsinnaasumik allassimanersut paaseruppara."
Tamanna tunuliaqutaralugu makkuninnga apeqquteqarpoq:
Innuttaasut 345 eqqunngissorisaminnik pineqartut maalaarutaat Naalakkersuisut qanormita iliuuseqarfigaat?
Qanoq siunissami pilersaaruteqartoqarpa nalaattakkat taama ittut aaqqiiviginiarlugit?
Peqqissutsimut sullinneqarnermi eqqunngitsumik sullinneqarnermi maalaartarfiup ukiumut maalaarutit qassit nunarput tamaat isigalugu tigusarpai?
Innuttaasut maalaartarfiat innuttaasunit qanoq ilisimaneqartigiva? Peqqissaavinni periarfissaq tamanna takuneqarsinnaava?
Nunatsinni peqqissaaviup aaqqissuussaanerata innuttaasut akeqanngitsumik katsorsartissinnaaneq periarfissaraat. Akeqanngitsumik katsorsarneqarnermi suut periarfissaappat?
Anersaartorniarnermikkut ajornartorsiutillit, sapigallit ikigisassaanngillat nunatsinni. Taakkununnga periarfissat suuppat, soorlu sapigaqartut suut sapernerlugit paasiniassagunikku?
Kiisalu ilisimaneqarpa nunatsinni sapigaqartut qanoq annertuginersut?