Sisimiuni innuttaasoq: Toqqissisimananngilaq

Sisimiuni eqimattakkaarluni persuttaasaqattaarnerit innuttaasunut 5.500-t missaanniittuunut toqqissisimatitsinngillat.

Innuttaasoq, 32-nik ukiulik Miilu Enoksen, Sermitsiaq.AG-mut oqaluttuarpoq persuttaasimanerit piffissami kingullermi akulikitsut. Kikkut taamaaliornersut innuttaasunit ilisimaneqarput.

- Illoqarfiup iluani persuttaasut perulluliortullu arlallit piffissami kingullermi tusarsaapput. Illoqarfigisami taamaaliortoqartaarnera soorunami toqqissisimananngilaq, Miilu Enoksen Sermitsiaq.AG-mut oqaluttuarpoq.

Miilu Enoksen marlunnik qitornaqarpoq unnukkullu anissanani. Taamaattoq ullukkuugaluarpalluunniit persuttaasunik allanilluunniit sakkortuunik pisunik meeqqanilu naammattoorseriasaarnissani ernumagaa.

- Pisut aamma ullukkut pisarput. Pingaartumik akissarsiffinni qaammatilluunniit naanerani. Unnukkut anisanngikkaluarlunga suli toqqissisimanarinngilara. Meeqqat tamakkuninnga aamma isigitikkusunngeqaakka, Miilu Enoksen oqaluttuarpoq.

Kommune: Suliaq ilungersunartoq

Qeqqata Kommuniata kikkut persuttaasarsimanersut aamma ilisimasaqarfigai. Qeqqata Kommuniani tungiuinermut immikkoortortaqarfimmi pisortaq Martha Lund Olsen Sermitsiaq.AG-mut ilisimatitsivoq isumaginnittoqarfimmi suliat arlallit ingerlasut.

- Kisianni inuusuttuaqqat 15-ileereersimasut ulloq unnuarlu angerlarsimaffimmut inissinneqarnissaat ajornakusoortuuvoq, inissiinissamut piumasaqaatit killiliimmata. Maannakkorpiaq akuersissutissat utaqqivagut, Danmarkimut angerlarsimaffinnut inissiinissanut tunngatillugu suliat ingerlaqqissappata, Qeqqata Kommuniani tungiuinermut immikkoortortaqarfimmi pisortaq Martha Lund Olsen Sermitsiaq.AG-mut oqarpoq.

Innuttaasoq aamma kommuni tungiunermut immikkoortortaqarfimmi pisortaq naapertorlugit Sisimiuni unnuariaqanngilaq, allatigulluunniit inuusuttuaqqat meeqqallu unnuakkut aneertut pillugit pinaveersaartitsinissamut suliniaqatigiiffeqarani. Qeqqata Kommunianili miljøarbejdereqarpoq, taannalu Sisimiuni pinaveersaartitsinernik allanik suliaqartarpoq.

- Aamma suliat uku miljøarbejderimut oqimaappallaarujussuarput. Miljøarbejderi allarpassuarnik, pinaveersaartitsinermut tunngasunik suliaqarpoq. Ajoraluartumillu piffissami sivitsulersumi suleqatissaanik inuttassarsiuussisaraluarluta suli pissarsinngilagut, Martha Lund Olsen oqarpoq.

Suliniutit ersarissut amigaataapput

Qeqqata Kommuniani borgmesteri, Malik Berthelsen, Sisimiuni innuttaasunut kaammattuuteqarpoq persuttaanernik ilisimasaqarunik politiinut suliassanngortitsillutik nalunaaqqusilluni.

Malik Berthelsenip (S) erseqqissarpaa Sisimiuni persuttaasaqattaarnerit unitsittariaqartut, illoqarfimmut tusaamanerluutaalermata.

Miilu Enoksen innuttaasutut nammineerluni kommunimut isumaginnittoqarfimmut sianertariaqarnikuusimavoq meeqqat inuusuttuaqqallu unnuakkut aneertut ernumagalugit. Taassuma aamma ujartorpaa pinerluttoqannginnissaanut pinaveersaartitsinermut suliniutit ersarinnerusut:

- Soorlu unnuami pigaartut, assigisaalluunniit toqqissisimanarnerussagaluarput. Aammali perulluliortoqalinnginnissaanut pinaveersaartitsinerit allat pisariaqaraluarput, innuttaasoq oqarpoq.