Sisimiuni eqqaassutissaq serlersaarfigineqarsimasoq

Eqqaassutissaq alla aamma serlersaarfigineqarsimavoq.

Tamatumuuna Jørgen C. F. Olsenip Sisimiuni eqqaassutissaa serlersaarfigineqarsimalluni. Eqqaassutissaq serpalittaammik qalipaatitalimmik seqqartarneqarsimavoq, tassungalu atatillugu politiit arfininngornerup unnuaani nalunaarfigineqarsimapput:

- Sisimiuni innuuttaassumit nalunaarut tiguneqarsimavoq, taassuma unnuaq nalunaaqutaq marlunut inummik eqqaassutissap eqqaaniittumik takusaqarami nalunaarutigisimavaa, pigaartut pisortaat Aqqaluk Petersen oqaluttuarpoq, nangillunilu:

- Polittit ornigukkamik angut qalipaammik piiaaniarsarisoq siumorsimavaat, angutip pineqartup eqqaassutissap qalipanneqarsimanera uggorigamiuk qalipaat piiarniarsaralugu oqaatigisimavaa.

Politiit erseqqissumik oqaatigisinnaanngilaat, eqqaassutissamut serlersaarineq qanga pisimanersoq. Politiilli paasissutissaataat malillugit arfininngornerup unnuaa sioqqullugu pisimannguatsiarpoq.

Takunnissimasinnaasunik oqaloqateqarusuttut

Politiit serlersaarisimasoq suli tigusarinngilaat, taamaammallu takunnissimasinnaasunik ujaasipput.

Jørgen C. F. Olsenip eqqaassutissaanut serlersaarisimasoq pillugu paasissuteqartoqarpat politiinut 70 14 48 aqqutigalugu sianertoqarsinnaavoq.

Jørgen C. F. Olsen 1967-imi Kalaallit Nunaanni Landsrådimi siullersaalluni siulittaasuusimavoq, namminersornerullutillu oqartussaanissamut isumassarsisimasut ilaatut taaneqartarluni.

1985-imi toqukkut qimaguppoq.

Juunip 21-ata unnuaani Nuummi Hans Egedep eqqaassutissaa qalipaammik aappaluttumik kuerarneqarsimavoq.