Sisimiuni borgmesteriusimasoq toqukkut qimaguppoq

Sisimiuni ataqqinaammik innuttaasoq, Emilie Lennert, 87-inik ukioqarluni toqukkut qimaguppoq

Sisimiuni sunniuteqarluartut ilaat Emilie Lennert toqukkut qimaguppoq.

Qeqqata Kommuniani borgmesterip Malik Berthelsenip eqqaaniarlugu ima allappoq:

'Alianaqisumik maajip pingajuani 2019 paasitinneqarpugut Sisimiuni ataqqinaammik innuttaasoq Emilie Lennert 87-inik ukioqarluni toqukkut qimagussimasoq.
Emilie Lennert politikerit arnataasa siulliit ilagivaat, Sisimiunilu 1967-imi Kommunalbestyrelsiusimasumut 35-nik ukioqarluni qinigaanikuulluni, 1975-imilu Sisimiut Kommuniani Borgmesterinngorluni.

Emilie Lennert 1967-imiit 2001-ip tungaanut kommunalbestyrelsimi katillugit ukiuni 34-ni ilaasortaanikuuvoq, taakkunannga ukiut aqqaneq-marluk siulittaasuulluunilu borgmesteriusimalluni.

Qinikkatut sulineq

Kommunalbestyrelsimi ilaasortaanermi saniatigut Inatsisartuni 1984-imiit 1995-ip tungaanut ukiuni aqqanilinni ilaasortaasimavoq. Qinigaaffiup taassuma iluani ataatsimiititaliani ukunani ilaasortaasimavoq; isumaginninnermut tunngasut, kultureqarnermut ilinniartitaanermullu immikkoortortaq, tjenestemandit pillugit ataatsimiititaliaq, Naligiissitaanermut Siunnersuisoqatigiit kiisalu Inatsisartut Folketing-imilu attaveqarnissamut ataatsimiititaliaanni 1987-imiit 1995-ip tungaanut.

Emilie Lennert politikkikkut suliaqarnermi nalaani tatigineqaatigalugu suliarpassuaqartarnikuuvoq. Ilaatigut 1972-imi Kommunit Kattuffiannik (KANUKOKA) pilersitseqataasimavoq, tassani 1979 tungaanut siulersuisuni ilaasortaasimalluni. kommunit nammineernerulernissaannut tamavaaruteqaartumut Nammagassanik suliassanillu agguataarinermut ataatsimiititaliamut peqataasimavoq, tassani kommunini aqunneqarnerat 1976-imi januaarip aallaqqaataa aallarnerfigalugu naalagaaffimmiit kommunalbestyrelsimit akisussaaffigineqalerneri inerneralugu.

Emilie Lennert Knud Rasmussenip Højskoliani piffissami 1967-imiit 1993-imut siulersuisuni ilaasortaasimavortaaq, tassani siulersuisuni siulittaasuusimalluni 1979-imiit 1993 tikillugu. 1980-imiit suliap naammassineqarnissaata tungaanut Inatsisartuni Isumaginninnerup aaqqissuuteqqinneqarneranut ataatsimiititaliarsuarmut ilaasortaasimavoq.

Sisimiunik siuarsaaqataasoq

Emilie Lennert katillugit ukiut 50-it sinnerlugit inuiaqatigiinnut sullissisimavoq (erninermut atatillugu sivikitsukullammik sulinngiffeqartarluni (meeqqat sisamat)). 1950-imi Nunap naalagaani kingusinnerusukkut landshøvdingeembedet-imik taaguutinittumi Nuummi aallartippoq. Malitsigisaanik Danmark-imi Niels Brochs Købmandsskolens Medhjælperskole-mi ilinniagaqarluni. 1952-imi Nuummi atorfinippoq, kingorna nammineq kissaateqarnermigut Sisimiuni kæmnereqarfimmi 1967-imi kommunalbestyrelsimut qinigaanissami tungaanut atorfeqarluni.

1997-imi Kalaallit Nunaanni Namminersornerullutik Oqartussaniit Nersornaat sølviusumik nersornaaserneqarpoq, 2002-milu Sisimiuni ataqqinaammik innuttaasutut toqqarneqarlunilu aammalu Kommunit Kattuffiannit KANUKOKA-mit 2017-imi ataqqinaaserneqarpoq.
Emilie-p sivisunerpaamik suliatigut tunniusimaffiginerpaasimasaa tassaavoq najukkami politikkikkut sulineq kommunimilu ineriartortitsineq. Sisimiut ullutsinni illoqarfittut ingerlalluartutut, pisoqarfiusutut eqeersimaarfiusutullu ilisimaneqarneranut annertuumik ataqqineqaatigivaa.

Emilie Lennert-ip eqqaaneqarnera ataqqinartuuli.

All. Malik Berthelsen, Borgmesteri.'

Powered by Labrador CMS