Sisimiuni atuartut kukkusoqarneratigut angerlartikkallarneqartut
Sisimiuni meeqqat atuarfianni atuaqatigiinni ataatsini tunillatsissimasoqarnera pissutigalugu atuaqatigiit angerlartinneqarsimapput, angerlarsimaffimmilu misissortinnerup tunillatsissimannginneq takutippagu aatsaat atuariartoqquneqarlutik. Tamannali kukkunerusoq, atuartullu atuarsinnaasut, ilinniartitaanermut pisortaq ilisimatitsivoq.
Minngortuunnguup Atuarfiani klassemi ataatsimi atuartut angerlartinneqarallarsimapput. Atuaqatigiinni tunillatsissimasoqarmat atuaqatigiit angerlarsimaffimmi misissorteqqaarlutik, tunillatsissimanngikkunik atuariartorsinnaasut ilisimatinneqarsimasut, Sermitsiaq.AG-p paasivaa.
Nunatsinnili angerlarsimaffimmi misissuutit pisiniarfinni nungutsiterput, aamma Sisimiuni. Kommunillu angerlarsimaffimmi misissuutinik suli pissarsinngillat.
Qeqqata Kommuniani ilinniartitaanermut aningaasaqarnermullu pisortaq, Annga Lynge maanna ilisimatitsivoq atuartunik angerlartitsigallarneq kukkusoqarsimaneranit aallaaveqartoq, atuartullu atuarsinnaasut.
- Tamanna atuarfimmi ataatsimi kukkusumik nalunaaruteqaraluarnermik tunngaveqarpoq, kisianni naqqiivigineqareerpoq, angajoqqaanullu nalunaarut eqqortoq ingerlanneqareerluni. Atuartut ersiuteqanngitsut tamarmik atuarsinnaapput, Annga Lynge Sermitsiaq.AG-mut ilisimatitsivoq.
Qeqqata Kommuniata suli ilisimanngilaa kommuni qaqugu angerlarsimaffimmi misissuutinik peqalissanersoq.
Naalakkersuisut ataasinngornermi tusagassiortunik katersortitsigamik ilimasaaripput kommunit tallimaasut katillugit 40.000-inik tunineqarumaartut, namminnerlu taakku agguaakkumaaraat.