Sisimiut
'Sisimiuni aalisartunut atugassarititaasut akuersaarneqarsinnaanngilluinnartut'
Aalisarnermut Naalakkersuisoq, Sisimiuni aalisartut atungaannik piaarnerpaamik iliuuseqartariaqartoq, Siumup najukkami immikkoortortaqarfia isumaarpoq.
- Sisimiuni saarullippassuaqarpoq, taamaattoq umiatsiaararsortut ullormut 400 kg tunisinnaavaat, tamanna akuersaarneqarsinnaanngilaq.
Sisimiuni Siumup siulittaasua, Kaaleeraq Møller Andersen, tusagassiuutinut nalunaarummi taama allappoq.
Atuaruk: Sisimiuni aalisartut umiarsuarnik tunitsivinnik kissaateqarput
Atungassarititaasut akuersaarneqarsinnaanngitsut
Siumut najukkami immikkoortortaqarfiata paasisimavaa, aalisartut piniutiminnik aserfallatsaaliinissaminnut akissaqarpianngitsut.
- Ukiut arlerpai Sisimiuni aalisartut siulittuutigalugu saarullippassuit takkutilersut, ilumullimi siumut isigaluni nunatta pingaarnerpaatut inuutissarsiutaanik taaneqartartoq ingerlanneqartuuguni, ataavartumik aalaakkaanerusumillu ingerlatsisoqarsinnaanera qularnanngikkaluarpoq, Kaaleeraq Møller Andersen oqarpoq.
Taamaattumik taanna piumasaqarpoq, Aalisarnermut Naalakkersuisoq, Karl-Kristian Kruse (S), piaarnerpaamik iliuuseqartariaqartoq,
- Sanilitsinni aalisartut imannaannaq aalitsattut, nunatsinnili piumassuserinngilluinnakkaminnik naparliinnartut. Naalakkersuisumit neriorsorneqarput umiarsualiisoqarnissaanik akuersissuteqartoqarnissaanik, taamaattoq maannamut suli ersarilluinnartumik paasitinneqanngillat umiarsuaq qaqugu tikissanersoq aammalu qaqugu tunitsivigineqarsinnaalissanersoq qanorlu annertutigisumik tunitsivigineqarsinnaasassanersoq, Sisimiuni Siumut nalunaaruteqarpoq.