SISAp oqaluttuarisaanerani pissarsiat amerlanersaat: 249,6 million koruunit

Soraarnerussutisiaqalernissamut ingerlatseqatigiffiik ilaasortat ileqqaaruteqarnerisigut 2017-imi 249,6 million koruuninik pissarsivoq. SISA-p oqaluttuarisaanerani pissarsiat amerlanersaraat

- Angusarissaarluarnerput nuannaarutigeqaarput, pisortaaneq Søren Schock Petersen oqarpoq.

249,6 millionit koruunit – pissarsiat SISA-mi ilaasortat soraarnerussutisiassanut ileqqaarutaat
2017-ip ingerlanerani taamatut amerleriartigaat.

Ingerlatseqatigiiffik tusagassiuutinut nalunaarummi taama allappoq.

- Angusarissaarluarnerput nuannaarutigeqaarput, pisortaaneq Søren Schock Petersen oqarpoq.

Nangillunilu:

- Tamassuma assigaa ilaasortat ileqqaarutaasa ukioq tamaat agguaqatigiissillugu 9 procentimik erniaqarnerat. Erniat taakku sumi tamani pissarsiarineqarneq ajorput, soraarnerussutisiassaqalernissamullu aningaasaateqarfinnut allanut sanilliullugu angusarissaarneroqaagut.

Ilaasortat amerleriaateqarnerat

Søren Schock Petersen naapertorlugu, SISA-mi ilaasortat soraarnerussutisiassatullu ileqqaakkanut akilerneqartut 2017-imi amerleriarsimapput. Kalaallit Nunaanni suliffeqarfiit sulisuminnut tamarmiusunut soraarnerussutisiassanik aaqqissuussineq pillugu isumaqatigiissuteqarnissaannut SISA-p 2016-ip naanerani ammaappai. Piffissap taassuma tungaangut SIK-p isumaqatigiissutai malillugit sulisut kisimik SISA-mi ilaasortanngorsinnaanikuupput.

- Soraarnerussutisiaqartarnermi allannguutit annertuut tunngavigalugit ukioq kingulliup ataatsip aamma ukioq ataatsip affallu iluanni soraarnerussutisiassat soqutigineqaleriartornikuup-
put. Soraarnerussutisiassanut pinngitsoorani ileqqaartarneq pillugu inatsisip 1. januari 2018-imi atuutilernerata kingorna soqutiginninneq annikinnerulernikuunngilaq, Søren Schock Petersen oqaluttuarpoq.

2017-imut naatsorsutit siulersuisut ulloq 18. apriili ataatsimeersuarnermi inassuteqaatissaat ataatsimeersuarnerup kinguninngua ingerlatseqatigiiffiup nittartagaani avammut saqqummiunneqassapput.

SISA pillugu paasissutissat:

SISA ilaasortanit pigineqarpoq, taamaammallu aktiaateqartunut sinneqartooruteqartitsissanani. Anguniagaq pingaarneq tassaavoq Kalaallit Nunaanni kattuffinnut inuussutissarsiutinullu pitsaasunik soraarnerussutisiassat pillugit aaqqissuussinissaq, annertunerpaanik pissarsiaqarluni annikinnerpaanik ajutoorfissaqarluni.

  • Soraarnerussutisiassanut ileqqaakkat 31. decembari 2017 katillugit 3.135,8 million koruunit
  • 2017-imi ileqqaakkanut akiliutit 210,2 million koruunit.
  • Ilaasortamut ataatsimut ataatsimut aningaasartuutit 2017-imi 387 koruunit.
  • Kalaallit Nunaanni suliffeqarfiit sulisuminnut SISA-mi soraarnerussutisiassaannut akiliuteqartartut 200-it sinneqarput.
  • Soraarnerussutisiaqartunut 800-nut 2017-imi tunniunneqarput 32,4 million koruunit.
Powered by Labrador CMS