2022-p aallartinnerani aningaasaliissuteqartarnermi niuerfinni annertuumik nalorninartoqartitsivoq, tamannalu soraarnerussutisianut aningaasaateqarfiup SISA-p ukiup affaani siullermi 727 mio. kr-nik annaasaqarfigaa.

SISA Kalaallit Nunaanni soraarnerussutisianut aningaasaateqarfiit annersaraat, qujanartumillu ukioq manna malunnaatilimmik ingerlalluartoqarneruvoq.

LÆS OGSÅ: SISA annaasaqartoq: Soraarnerussutisiaqarnermut aningaasaateqarfik 700 mio. kr.-t sinnerlugit annaasaqarpoq

Soraarnerussutisianut aningaasaateqarfik 350 mio. kr.-nik pissarsiaqartitsisoq, ukiup affaanut naatsorsuutit takutippaat.

Sinneqartoorutinit 48 mio. kr.-nit soraarnerussutisiani pissarsianut akileraarummut akiliutigineqassapput. Soraarnerussutisianut aningaasaateqarfiup angusaq naammaginartutut nalilerpaa, kisianni suli nalorninartoqarpoq:

Suli annertuumik nalorninartoqartoq

- Aningaasaliissuteqartarnermi angusaq 2023-mi ukiup affaani siullermi naammaginarpoq, kiisalu 2022-mi aningaasaliissuteqartarnermi annaaneqartut affaasa missaat iserteqqinneqarput. Taamaattorli suli aningaasaliissuteqartarnermik niuerfinni suli annertuumik qulartoqarpoq, SISA ukiup affaanut nalunaarusiami allappoq.

Ukiup affaata tullianut naatsorsuutini, SISA-p nalorninartut aalajangersimasut arlallit erseqqissarpai:

- Aningaasat pisissutaasinnaanerisa nalikillinerat suli annertuvoq aamma tamatuma kingunerisinnaavaa aningaasarsiornerup kinguariarnera kiisalu tamatuma kingunerisaanik aktiat nalingisa appariartornerat. Erniat 2022-mi annertuumik qaffapput tamannalu obligationini annertunngitsumik annaasaqaataavoq.

Sorsunneq aamma pissanganartoqarnera

- 2023-mi ukiup suli annertunngitsumik annaasaqaataavoq, kiisalu erniat suli qaffaqqinnissaat aarlerinaateqarluni. Taamatuttaaq suli Ukrainemi sorsuttoqarpoq kiisalu Kinap aamma Nunat killiit akornanni pissanganartoqarpoq, taamaattumik nunarsuaq tamakkerlugu politikikkut pissutsit aammattaaq qularnermut tapertaavoq, SISA ukiup affaanut nalunaarusiamini allappoq.

Soraarnerussutisianut aningaasaateqarfiulli aningaasaliinerit siunissaq ungasinnerusoq eqqarsaatigalugu pissarsiffiunissaat qularinngilaa.

Ukiup affaani siullermi 2023-mi ilaasortat akileeqataassutaat f.e.r. katillugit 176,6 mio. koruunit akilerneqarput. Ukiumi siuliani piffissami tassani ilaasortat ingerlaavartumik akileeqataassutaannut naleqqiussilluni 14,3 mio. koruuninik amerlipput kiisalu aaqqissuussinernit allanit nuunneqartut 1,1 mio. koruuninik apparlutik, SISA nalunaarusiami taama allappoq.