SISA iluanaarutinik marloriaatinngortitsisoq

Iluanaarutit SISA-mi ilaasortat katersaasa fem milliader koruunit angusimanerannut iluaqutaasimapput, pisortaq Søren Schock Petersen ilisimatitsivoq

SISA ingerlatseqatigiiffiup aningaasaliissuteqartarnera pineqartillugu 2021-mi angusaqarluarsimavoq. Iluanaarutigineqartut 2020-mi iluanaarutigineqarsimasut marloriaataat sinnerlugit amerlisimagamik, SISA nittartakkamigut ilisimatitsivoq.

Ingerlatseqatigiiffik aningaasaliissuteqartarnerit erniortitsivinnut marlunnut avillugit ingerlatsisarpoq, taakku tassaapput Annertusiartortitsineq aamma Aalaakkaasut. Annertusiartortitsinermi 60 procentit missaanniittunik aktiaateqartoqarpoq. Aktiaatigineqartullu Aalaakkaasuni 20 procentit missaannik annikillisinneqarsimallutik.

Iluanaarutigineqarsimasut tabelimi tulliuttumi takuneqarsinnaapput:

SISA Pension pillugu

SISA 41.000-it missaannik ilaasortaqarpoq, taakkunannga 20.000-it akiliuteqartartuullutik. SISA soraarnerussutisiaqarnissamut akiliutigineqartunik ukiumut 300 millioner koruuningajannik pissarsisarpoq, soraarnerussutisiassanillu 5 milliarder koruuniusunik nakkutiginnittuulluni.

SISA 1999-imi SIK-p isumaqatigiissutai malillugit sulisunut soraarnerussutisiassanik katersivittut pilersinneqarpoq, ullumikkulli assigiinngitsunik sulialinnut suliffeqarfinnullu assigiinngitsunut tamanut soraarnerussutisiaqarnissamik aaqqissuussaq neqeroorutigineqartarluni.

Pissarsiffik: SISA Pension

- Taamatut tunngaviusumik erniortitsivinnut marlunnut inissiilluni aaqqiisimaneq isumaqarpoq aningaasaliissuteqarnermi piffissaq sivisooq isigalugu aaqqissuussisimaneq qanoq ukioqarnermik aalajangerneqartartoq. Katersivik tamaat isigalugu taamaalilluni periarfissaqarpoq katersat annertunersaat aktianut aningaasaliissutigineqarsinnaaneri, taamaalinikkullu aarlerinaateqarsinnaasutut taaneqarsinnaasumik aningaasaliissuteqarfiusumik, kisianni aamma tamanna erniortitsilluarfiusinnaanerusumik periarfissiisarpoq. Soraarninngornissap qanilliartornerani aarlerinaataasinnaasoq taanna milliartortinneqartarpoq, SISA Pension nittartakkamigut allappoq.

SISA Pensionip 2019-imiilli Vækstfonden aamma Greenland Venture aningaasaliissuteqartarmut atatillugu suleqatigiisimavai, tamatumani siunertarineqarluni Nunatsinni suliffeqarfiit suli annertunerusumik aningaasatigut periarfissinneqarnissaat.