Sipineq+: Siulersuisut siulliit inissipput
Nunatsinni LGBTQ+-imi peqatigiiffimmi nutaami Qillaq Olsen siulittaasunngorpoq. Peqatigiiffik nunatsinni LGBTQ+-it pisinnaatitaaffiinik suliaqaqataaniarpoq.
Peqatigiiffik Sipineq+ atulersinneqarluni siulersuisortaartinneqarluni 9. marts ataatsimiinnermi pilersinneqarpoq. Peqatigiiffiup suiaassuseq, suiaassutsinullu sorlernut soqutginnittuuneq apeqqutaatinnagu pisinnaatitaaffinnik pitsanngorsaanermik suliaqarniarpoq.
Qillaq Olsen peqatigiiffimmi Sipineq+-imi siulittaasunngorpoq. Peqatigiiffiup nunatsinni 2SLGBTQIA+ tunuliaqutarai.
Siulersuisut tassaalerput:
- Qillaq Olsen, siulittaasoq
- Cecilie Olsen-Heilmann, siulittaasup tullia
- Lisa Larsen, aningaaserisoq
- Berda Larsen, ilaasortaq
- Birte Olsen, ilaasortaq
- Erni Kristiansen, ilaasortaq
- Juno Berthelsen, ilaasortaq
- Peqatigiiffik tamanut ammasuuvoq, tamanillu tikilluaqqusillunilu, Qillaq Olsen Sipineq+ pillugu Sermitsiaq.AG-mit siornatigut apersorneqarami taama oqarsimavoq.
Taaguutit pillugit suliaqalereersoq
Peqatigiiffik Sipineq+ suiaassuseq, atoqatigiittariaatsillu pillugit taaguutinik suliaqalereerpoq. Suliaqarnermi Ilisimatusarnermi nutserisunngornianik ilinniarfik suleqatigineqarpoq, Oqaasileriffillu ataavartumik attavigineqarluni.
Peqatigiiffiup meeqqat atuarfianni kinguaassiutit pillugit ilinniartitsissutit assigiinngiiaartuunermut tunngasunik imaqarnerunissaat aamma sulissutiginiarpaa. Taassuma saniatigut ataataaqataasut meeravissiartaarnermi sulinngiffeqartarnissaat nunatsinnilu ikinnerussuteqartut tarnikkut peqqissusaasa eqqumaffigineqarnerulernissaat aamma sulissutiginiarpaa.
