Skip to main content

Sipaarniuteqarnissamik pilersaarutit politikerit illersorpaat

Ilinniagaqartitsinermut Naalakkersuisut NIvi Olsen kiisalu peqqissutsimut Naalakkersuisuugallartoq Martha Lund Olsen isumaqanngillat Naalakkersuisut naakkittaatsumik sipaarniuteqarniartut

Ukioq mannamut aningaasanut inatsisissatut siunnersuumminni Naalakkersuisut siunniuppaat peqqinnissaqarfik ukiut tamaasa 15 millioner koruuninik sipaarniuteqarfigineqassasoq, ilinniartitaanerlu ukiumut 11 millioner koruuninik sipaarniuteqarfigineqassasoq. Tamanna oqallitsitsilerpoq, pingaartumik nakorsatut atorfiit nuunneqarnissaannik siunnersuut.

Sapaatiummat peqqissutsimut Naalakkersuisuugallartup Martha Lund Olsenip, Siumut, siunnersuunni illersorpaa:

– Uannut pingaaruteqarpoq marluk erseqqissassallugit, tassa ilaatigut sipaarniuteqarnissamik siunnersuutit pinngitsoorani piumasaqaataanngimmata taamaattumillu oqaluuserineqarsinnaallutik, ilaatigullu nakorsatut atorfinnik atorunnaarsitsiniartoqanngimmat, taanna oqarpoq innersuussutigalugu Qaanaami Illoqqortoormiunilu nakorsatut atorfiit napparsimmavimmut allamut nuunneqaannassasut.

Telefonikkut nakorsiartitsisarneq atorneqarneruleqquvaa

Illoqarfiit nakorsamit tikinneqartarunnaarnavianngillat, Martha Lund Olsen oqarpoq. Aalajangersimasumik nakorsaqarunnaartussaagaluarpoq, ilaatigut pissutigalugu isorliunerusunut nakorsassarsiorneq ajornakusooqimmat, taanna oqarpoq.

Illoqarfinnili taakkunani peqqissaasumik sulisoqalissaaq, qaammatillu tamaasa nunap immikkoortuani napparsimmavimmit nakorsamik tikittoqartassaaq sapaatip akunnera ataaseq illoqarfimmiitassalluni. Taava napparsimasut nakorsamut sianersinnaapput peqqissaasorlu ikiortigalugu nakorsiarlutik, Martha Lund Olsen erseqqissaavoq, tamannalu peqatigalugu ´toqqissisimajunnaarsimaneq´ siunnersuutip kingunerisinnaasaa utoqqatsissutigalugu.

Nivi Olsen 11 millioninik sipaaruteqassaaq

Aamma ilinniartitaanermut, kulturimut ilageeqarnermullu Naalakkersuisup NIvi Olsenip, Demokraatit, Naalakkersuisut aningaasanut inatsisissatut siunnersuutikkut sipaarniuteqarnissamik siunnersuutaat sapaatiummat illersorpaa. Taassuma oqartussaaffeqarniani 11 millioner koruunit sipaarniutigineqassapput, naatsorsuutigineqarporlu sipaarniuteqarnermi eqqorneqarnerpaassasut Piareersarfiit aamma Sisimiuni Tech College Greenland.

Aalajangiineq ajornakusoortoq

Nivi Olsen oqarpoq ilinniagaqarfiit annernannginnerpaamik eqqugaasussat sipaarniuteqarfiginiarlugit:

– Tamanna soorunami tamakkiisumik anguneqarsinnaanngilaq, sipaarniutilli sammisaqarfinnut, ukiuni arlalinni atuinikinnerusimasunut imaluunniit suliffeqarfinnut peqatigiiffinnulluunniit, ukiuni arllinni sinneqartooruteqarsimasunut  amerlasuunillu nammineq aningaasaateqalersimasunut, inissinnerisigut neriuutigaara pisortat aningaasaqarniarnerat atasinnaasoq angusinnaassallutigu, tamannalu peqatigalugu politikkikkut anguniakkavut angullugit, NIvi Olsen oqarpoq.

Qanittukkut Sermersuup borgmesterita Asii Chemnitz Narupip KNR-kut Naalakkersuisut isornartorsiorpai Illoqqortoormiuni Qaanaamilu peqqinnissamik suliniuteqarnermik annikillisaanerarlugit.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER