atuartitaaneq

Sipaarniartoqareersoq: S A-lu nassuiaasoqarnissaa piumasaraat

Meeqqat atuarfiinut sipaarniarnissaq pillugu borgmesteri Asii Chemnitz Narup IA paasissutissiisariaqartoq Siumut Atassullu piumasaqarput

Borgmesteri Asii Chemnitz Narup sipaarniarnissaq pillugu nassuiaasariaqartoq Siumumit Atassummillu piumasarineqartoq Siumup gruppiani siulittaasup Martha Abelsenip nalunaarutigaa

Kommuneqarfik Sermersuumi meeqqat atuarfiinut sipaarniartoqarnissaa Imakimit, ilinniartitsisunit angajoqqaanillu isornartorsiorneqarpoq.

Siumup Atassutillu Kommuneqarfik Sermersuup kommunalbestyrelseani ilaasortat tusagassiutinut ataatsikkut nalunaaruteqarput sipaarniarnissaq pillugu paasissutissat annikippallaartut.

- Sulisimaneq naliliiffigineqarmat isumaqatigiissutigineqarpoq sinaakkutaasumik sipaartoqarnissaanik aalajangiussinissap tungaanut ataatsimiititalianut aammalu aningaasarnermut ataatsimiititamut sipaarniutiginiarneqartut pillugit erseqqaarissumik sukumiisumillu paasissutissiisoqarsimanngitsoq, taamallu ajornarsimasoq sipaarniutiginiarneqartut ataasiakkaat qanoq sunniuteqarsinnaanerat naammaginartumik paasissallugu.

Nangippullu:

- Aammattaaq gruppip iluani nassuerutigineqarpoq sorpiaat peqqutigalugit sipaarniutissat atuarfeqarnermut atatillugu pisariaqarluinnalersimanersut paasiuminaatsortaqartoq aammalu pineqartut iluini kikkut pilersitsisuusimanerat eqqarsaatigalugu.

- Siumummi gruppianit akuersaarneqanngilaq ilaatigut Namminersorlutik Oqartussat kommunit allat aningaasaqarnikkut ajornartorsiortut ikiorniarlugit 20 mill. koruuninik kommunip tigusiffigineqarnera atuarfeqarnerup iluani sipaaruteqartariaqalernermik peqqutaasut ilagigaat, tamannami kommunalbestyrelsip akuersineratigut akileraarutip procentimik ataatsimik qaffaavigineqarneratigut matussuserneqareermat.

Borgmesteri Asii Chemnitz Narup sipaarniarnissaq pillugu nassuiaasariaqartoq Siumumit Atassummillu piumasarineqartoq Siumup gruppiani siulittaasup Martha Abelsenip nalunaarutigaa.

Ilinniartitsisut angajoqqaallu Atuarfik Ukaliusamut attuumassuteqartut 10 million koruuninik sipaarniarnissaq pillugu sisamanngorpat akerliussutsimik takutitsissapput.

Powered by Labrador CMS