Sipaarniarnermit eqqugaasoq: RAL-ip Mary Arctica tunivaa, umiarsuaatileqatigiiffiulli iperavinngilaa
Royal Artic Linep Mary Arctica umiarsuaatileqatigiiffiup suleqatigiligaanut kingullermut Silver Linemut tunivaa. Umiarsuaq maanna Silver Marymik taaguuteqalertoq, maannamit attartortinneqassaaq.
- Suliffeqarfiup aningaasanik sipaarniarnerani illernartuutitaqanngilagut.
Ukioq manna siusinnerusukkut Royal Arctic Linemi pisortaq, Verner Hammeken oqarnikuuvoq.
Mary Arctica Silver Linemut aamma tunineqartoq ilanngullugu.
Royal Arctic Linep nittartagaani nutaarsiassami tamanna atuarneqarsinnaavoq.
Mary Arcticalli maanna Silver Marymik taaguuteqalertup, nunatta imartai qimavinnianngilai.
Silver Linemik suleqateqarneq
Naak umiarsuaq tunineqaraluartoq, Royal Arctic Linep umiarsuarmik aasat tamaasa ukiuni tallimani tulliuttuni attartortarniarlugu isumaqatigiissusiorpoq.
Aasaq manna aamma taamaassaaq. Silver Mary avannaanut pajuttaatit angalatinneqalissaaq, Royal Arctic Line allappoq. Tassa umiarsuaq suli ataatsimoortumik pilersuinermut suli ilaassaaq.
Umiarsuup imarpikkoortaatip Tukuma Arcticap angalanerani 317-imi usissat Avannaanukartut Silver Marymut nuunneqarput, ataasinngornermilu usilersuisoqaraluartoq ullormik ataasiinnarmik kinguaattoorluni Qeqertarsuup tunuanut tikinnissaa naatsorsuutigineqarpoq.
Uppernarsaatissat naleqqussarneqareerput sullitallu nassiussanut allagartanik nassinneqarumaarput Silver Mary umiarsuartut allanneqarsimassalluni.
- Silver Linep suleqatigilluarnissaa qilanaarivarput, Royal Arctic Line allappoq.