Siornatigut juumuut aqutsisorisimasaat kajumissaarivoq: Mianersoqqusinissamut piffissanngorpoq
Juumuut suliffimminni atugarisamikkut tatineqarnerat pillugu pitsaanerusumik iliuuseqartoqarnissaanut piffissanngortoq, juumuumit oqaatigineqarpoq. Aaqqiissutissaqarnerarpoq suliffimmik nuannarinninnerulersitsisumik – aamma aningaasartuutinik annertuumik ikilisitsisumik taartaasartunut.
Nunatsinni napparsimmavinni paarlattaasartut akissarsiannut Nunatta Karsianit aningaasarpassuit atorneqartarput. Juumooq Helle Juel Johansen peqqissutsimut naalakkersuisumut, Mimi Karlsenimut (IA), allakkani ammasuni AG-mit aamma atuarneqartuni taama allappoq.
Allakkat qulequtaqarput: Juumooqarnermut mianersoqqussut.
Aviisi AG allappoq.
Helle Juel Johansenip naalakkersuisumut saaffiginnissutimini ilaatigut taavaa assersuut una erseqqissoq, Nuummi Dronning Ingridip Napparsimmavissuani aasaq manna ullut tamaasa misigisartakkani:
Peqqissaasoq paarlattaasoq sapaatip akunnerini marlunni akileraareerluni SANA-mi 32.000 koruuninik akissarsisarpoq. Tassa imaappoq juumuup tassanerpiaq qaammammut suli akileraaruteqarnani akissarsiarisartagai, nassuiaavoq.
- Paarlattaasussanik innersuussisarfinni namminersortuneersut paarlattaasartut naggataatigut qaffasissorujussuarnik akissarsiaqalersinnaasarput, tassa ilaatigut aammattaaq suliffimmut atatillugu akeqanngitsumik ineqartinneqartarnermik ilaqartarluni, Helle Juel Johansen AG-mut oqarpoq.
23 millionit
Taanna nammineq piffissap ulapaarfiusup nalaani paarlattaasimavoq. Kisianni nammineq ”akikinnerit” ilagaat imaluunniit aningaasartuutitaqanngitsunut ilaalluni, tassa toqqaannartumik juumuunut aqutsisutut atorfeqarami taamaalillunilu atugarisassat nalinginnaasut atorlugit sulisimalluni.
Aaqqiissutit akisuut ilaatigut tassaapput aasaanerani paarlattaasartutut taaneqartartut, Danmarkimi paarlattaasussanik innersuussisarfiit aqqutigalugit piffissami ulapaarfiunerpaami paarlattaasutut sulisinneqartartut, aamma pikkorillutik suliassanik pisariaqartunik naammassisaqartartut. Akisuumik aaqqiissuteqarnermut naammagittaalliorneq nutaajunngilaq. Aamma aningaasartuutit peqqissutsimik isumaginninnerup aningaasaqarniarneranut tatisimanninnerat nutaajunngilaq. Ukiumi tamatumani qaammatini siullerni arfineq-pingasuni peqqinnissamut isumaginnittut katillugit 23 millionit koruuninik taamaallaat paarlattaasartunut aamma paarlattaasussanik innersuussisarfinnut aningaasartuuteqartut siorna kisitsisit takutippaat.
Aviisimi AG-mi atuarnerusinnaavutit. Aviisi uani pissarsiariuk:
