Siorapalummi piniartut tunitsivissaqanngitsut

Kalaallit Nunaani inoqarfiit avannarpasinnersaanni Siorapalummi, Qaanaamiit 50 kilometerit missaannik avannarpasinnerusumiittumi, ukiup taamaalinerani silarlukkajussinerata kingunerisaanik piniarneq tamarmi uninngavoq.

Qaanaap eqqaani qaleraleqarluarpoq, piniartullu amerlanerpaat aalisarnermut ikaarsaarsimalerput. Siorapaluulli eqqaani qaleraleqarfeqanngilaq, taamaattumillu aalisarnermik inuussutissarsiortoqarani. Akerlianilli Siorapaluup eqqaani piniagassarpassuaqarpoq, soorlu puisit, aarrit, qilalukkat qaqortat qernertallu, nannut timmissallu assigiinngitsut, kiisalu piniakkat allat mikinerusut soorlu ukallit teriannissallu ajornanngitsumik piniarneqarsinnaallutik. Taamaakkaluartorli nunaqarfimmi tunitsiveqanngilaq, tamannalu piniartut aningaasaqarnerannut eqquinerluppoq.

- Nunaqarfimmilu inuussutissarsiornikkut ineriartortitsisoqannginnerata kingunerisaanik ineriartorneq unittoorsimasoq, nunaqarfimmilu avinngarusimasumi ilaqutariit piniartukkormiut inooriaasiat Kalaallit Nunaata sinnerani inuuniarnikkut atukkanut naleqqiullugu allaanerulluinnartoq, Siorapalummi piniartoq 60-inik ukiulik Nukappiannguaq Hendriksen oqarpoq.

Aningaasarsiorfiusinnaasut killeqartut

Aavernik illersuineq piniarnerlu pillugit Namminersornerullutik Oqartussat nalunaarutaata nalilersuiffigineqareernerata kingorna, Kalaallit Nunaata Kitaani ukioq kaajallallugu aarrit piniagaasinnaanerat oktoberimi ammaanneqarpoq, Siorapalummilu piniartut oqarnerat naapertorlugu, ukiut kingulliit ingerlaneranni nunaqarfiup eqqaani aarrit amerlasoorujussuanngorsimapput.

Siorapaluk Royal Arctic Line-p umiarsuaanik pajuttunit ukiumut marloriarluni tikinneqartarpoq, ukiukkullu sapaatip akunnera allortarlugu qulimiguulimmik tikittoqartarluni. Ukiukkullu sikuunerani sikukkut qimussimik qamuteralannilluunniit Qaanaamut ingerlasoqartarpoq, piffissamilu julimiit septbemberi ilanngullugu sikup silallu qanoq innerat apeqqutaatillugu imaatigut Qaanaamut ingerlasoqartarluni.

Siorapalummi piniartut qulit missaanniipput, naatsorsueqqissaartarfimmilu allaqqavoq inuit 42-t Siorapalummi massakkut najugaqartut.

Aviisimi Sermitsiami atuarnerusinnaavutit. Aviisi uani pisiarisinnaavat.