Sioqqat maanna pisuunnguutigineqassapput

Sioqqanik avammut tunisinermut iliuusissatut pilersaarummik Naalakkersuisut suliaqassapput.

Sahara pingaarnertut niuerfiuniarunanngilaq, kisianni nunarsuup sinneranut sioqqanik tuniniaasoqarsinnaassaaq.

Taamaattumik sioqqat nunatsinnut iluanaarutinngorsinnaapput. Atassutip Inatsisartunut ilaasortaatitaa, Aqqaluk Heilmann taama isumaqarpoq.

Taakku avammut tuniniarneqarnissaannut Naalakkersuisut iliuusissatut pilersaarummik suliaqarnissaannik, taanna siunnersuuteqarpoq.

- Avammut tunisassiarisinnaanissaannik pilersaarusiortariaqarpugut. Tassami nunarpassuit sanaartornikkut, allatigullu atorfissaqartippaat, ilaatigullu aamma cementiliornikkut atorneqarsinnaallutik.

Sioqqat nioqqutiginissaannut Naalakkersuisut periarfissaqarsorinnipput. Sanaartornermut atortussatut kisimi atugassaannaanngillat. Sermip aanneraneersunik qajuusaasanngorsimasut naggorissaatissatut atorneqarsinnaapput.

- Paasissutissiissutigineqarsinnaavoq namminersorlutik suliaqartut sermip aanneraneersunik seqummaarissunik soqutiginnillutik takutereersimammassuk; aammalu Kalaallit Nunaanni aatsitassarsiorluni suliassat, sapinngisamik namminersortut aningaasaliinerinik aammalu akileraarutinit aningaasanik akuutitsinani annaasaqarsinnaanernik, aallaaveqartinneqartariaqartut, pingaartumik Naalakkersuisut politikkeraat, aatsitassanut naalakkersuisoq Erik Jensen (S) akissuteqaammini taama allappoq.

- Naalakkersuisut siunissami aatsitassarsiorluni suliassanut periarfissanik aallarniutaasunik De Nationale Geologiske Undersøgelser for Danmark og Grønland (GEUS) suleqatigalugu nalilersuipput. Tamanna tunngavigalugu sermip aanneraneersunik seqummaarissunik, soorlu assersuutigalugu sioqqanik, katersinissamut periarfissanik misissuinissaq Naalakkersuisut kissaatigaat.

Avammut tunisinissamut iliuusissatut pilersaarusiortoqarnissaanut siunnersuut Inatsisartut akueraat, taanna ukiakkut 2020-imi ataatsimiinnermi piareersimassaaq.

Annerusumik sermip aanneraneersunik qajuusaasanngorsimasut nunanut naggorinngitsunut avammut tunineqartalissappata, taava immaqa Saharamut sioqqanik tunisisoqarsinnaassaaq.

Powered by Labrador CMS