GU Nuummi
Sioorasaarisartut psykiatriimit unitsikkuminaatsut
Inuit pisinnaatitaaffiinut aamma ileqqorissaarnissamut tunngatillugu psykiatriimit sioorasaarinerit GU Nuummitut ittut pinngitsoortinnissaat ajornartoq, tarnip nappaataanut nakorsaq naliliivoq
Naak psykiatriip tarnimikkut annertuumik napparsimasut pinngitsaalillugit unitsittaraluaraat, sapaatip-akunnerata naanerani pisup assigisaa pinngitsoortinneqarsinnaasimanngilaq.
Dronning Ingridip Napparsimmavissuani tarnimikkut napparsimasut uninngavianni nakorsaaneq, Pia Glyngdal, taama Radioaviisimut naliliivoq.
Iliuuseqarpallaassanngitsut
- Inuttut pisinnaatitaaffiit eqqortissagutsigit taamaaliorsinnaanngilagut, taanna oqarpoq.
Nakorsallu tarnimikkut napparsimasunik suliaqartut nalorninartoqarfianik ersseqqissaavoq.
- Tassalu taannarpiaq tarnikkut nappaatilinnik sullissinerup nalorninartoqarfia. Aappaatigut iliuuseqarpallaassanngilagut aappatigullu iliuuseqanngippallaassanngilagut. Isumaqarpungalu sapaatip akunnerata naanerani pisup takutikkaa, napparsimasup qanorpiaq ikiorsinnaanera ilaannikkut nalusaripput.
Tarnimikkut napparsimasut napparsimaneranni arlalinnik ajutoorfissaqartoq, ilisimasallit oqarput.
Nakorsartinnissamut periarfissat arlallit
Tamassumalu taanna suliaq sunnersimasinnaavaa, tassani angut 28-inik ukiulik paranoid skizofrenimik napparsimasup ilinniarnertuunngorniarfikumini atuartut aamma ilinniartut toqunniarlugit sioorasaarpai.
Naak tarnimikkut napparsimasut napparsimavimmiinnissaminnut periarfissaqaraluarlutik, tarnikkut nappaatilinnut sullissivimmut ikaarsaarfimmukartoqarsinnaasaraluartoq imaluunniit tarnikkut nappaatilinnut sullissivimmut ikaarsaarfimmukartoqarsinnaasaraluartoq, najukkamilu napparsimmavimminnut tarnikkut napparsimasunut attaveqarfissanut saaffiginnissinnaagaluartut, nakorsiartup nammineq ikiorneqarnissani kissaatigeqqaartariaqarpaa.
Arlaqanngitsut pinngitsaalineqarsinnaapput
Nakorsiat arlaqanngitsuinnaat aamma pinngitsaalillugit unitsinneqarsinnaapput, assersuutigalugu taassuma iisartagartornini unitsissimappagu.
KNR-illu psykiatriimik suliaqartut oqaloqartigisimasaasa nalilerpaat, suliamut 28-inik ukiulimmut sioorasaarisumut tunngatillugu allatut iliuuseqartoqarsinnaanngitsoq, inuit siumut ilimagereerneqarsinnaanngimmata, aammalu nakorsat 'maskiinatut' iliuuseqartussaanngivimmata.
Aamma takukkit:
28-nik ukiulik aallaasilik ilinniagaqarfinni aallaasersornernit isumassarsisinneqarsimavoq
Politiit Kongevejimi tigusarinninniarnerannit assit
Taamaattumik politiit sakkortuuliorput