Sioorasaarinerup piffissaq tusarniaaffiusussaq sivitsortissinnaavaa

Kommuni Kujallermi kommunalbestyrelsimi politikkerip Naja Lundip (IA) ammasumik allagaqarnermigut, Aatsitassat pillugit inatsimmi paragraffi aalajangersimasoq Kuannersuarni aatsitassarsiornissaq pillugu oqallinnermut ilannguppaa. Piffissaq tusarniaaffiusussaq Naalakkersuisut tallimanngormat sioorasaarneqarsimanerat pissutigalugu sivitsorneqarsinnaavoq.

Aatsitassat pillugit inatsimmi allassimavoq, tusarniaanermut piffissarititaasoq "sivitsorneqassaaq, tassa tamanut ammasumik tusarniaanermi piffissarititaasup iluani tusarniaanermut atatillugu tamanut ammasumik naammaginartumik ataatsimiisitsinissamut periarfissaqarsimanngippat, imaluunniit Naalakkersuisut ataatsimiinnernut pineqartunut peqataasinnaasimanngippata”.

Naja Lundip taamaammat Aatsitassat pillugit inatsimmi paragraf 18a tunngavigalugu apeqqutigaa, Naalakkersuisut ”namminnineq inatsisiliaminnik uniooqqutitsinialeramik” qanoq iliuuseqassanerlutik eqqarsaateqarsimanersut.

Namminersorlutik Oqartussat naapertorlugit, Kujataani tusarniaatitsinissamut atatillugu Naalakkersuisut qaartartumeerinissamik sakkunillu atuinissamik tallimanngormat sioorasaarneqarsimasut. Tamatuma malitsigisaanik Aatsitassanut Naalakkersuisup Jens-Frederik Nielsenip nalunaarutigaa, sioorasaarisoqarsimanera pissutigalugu Naalakkersuisut pilersaarutaasutut innuttaasunik ataatsimiisitsinissamut peqataassanngitsut.

Namminersorlutilli Oqartussat ilisimatitsipput, ”navianaateqartoq nalilersortuarniarlugu, politikerillu akisussaaqataasut peqataaffigisaanni kingusinnerusukkut tusarniaanernut atatillugu ataatsimiinnerni peqataaffigisaassallutik”.

Sioorasaarut qanoq nipeqarpa?

- Peqataannginnissasssinnut tunngavilersuutigaarsi, sioorasaarneqarsimasutut misigisimasusi imaluunniit sioorasaarneqarsimasusi, tusarniaanissanut pineqartunut peqataannginnissassinnik aalajangerassi inatsit sorleq tunngavigaasiuk, aamma sioorasaarutit tigusimasani qanoq nipeqarpat, IA sinnerlugu kommunimi politikkeri ammasumik allagaqarluni aperivoq.

Jens-Frederik Nielsenip aalajangiussimavaa, innuttaasunik ataatsimiisitsinissatut nalunaarutigineqarsimasut "Greenland Mineralsip oqartussaniillu inuit attuumassutillit peqaataaffigisaanik, ataatsimiinnerit pilersaarutaasutut ingerlanneqassasut, taamaalilluni teknikkitigut qaffasissuseqartumik suliniummut tunngasumik oqaloqatigiittoqalissammat".

- Suliaq tusarniaanernut tunngasoq ingerlassaaq. Tamanna tamat oqatussaaqataanerisa inatsisinit illersugaasup ingerlanerivaa, kikkulluunniit suliamut isummersortissinnaatillugit, Jens-Frederik Nielsen tallimanngormat erseqqissaavoq.

Paragraffimi pineqartumi ima allassimasoqarpoq

§ 87 b. Naalakkersuisut Avatangiisinik nalilersuineq (ANN) kiisalu Inuiaqatigiinni piujuartussamik iluaqutaasumik sunniutissanik nalilersuineq tamanut ammasumik tusarniaanissamut ingerlateqqissavaat.
Imm. 2. Tusarniaanermut piffissaliussaq sapaatit akunnerinik 8-inik sivisussuseqarpoq. Tusarniaanermut piffissaq ulloq Naalakkersuisut tusarniaanermut najoqqutassanik tamanut ammasumik pissarsiarineqarsinnaalersitsiviannit aallartissaaq. Tusarniaanermut piffissaq arfininngornermi, sapaammi imaluunniit nalliuttumi naappat, tusarniaanermut piffissaq ulluinnarmut tulliuttumut sivitsorneqassaaq.
Imm. 3. Tusarniaanermut piffissarititaasoq sivitsorneqassaaq, tassa tamanut ammasumik tusarniaanermi piffissarititaasup iluani tusarniaanermut atatillugu tamanut ammasumik naammaginartumik ataatsimiisitsinissamut periarfissaqarsimanngippat, imaluunniit Naalakkersuisut ataatsimiinnernut pineqartunut peqataasinnaasimanngippata.

Powered by Labrador CMS