Sinniisut arlallit ivertinneqarput
IA aamma N Naalakkersuisunik ivertitsereernerup kingorna aamma Kujallermi borgmesterinngortitsisussaaneq tunngavigalugit sinniisunik arlalinnik Inatsisartunut isertitsipput. Siumumit ilaasortassaq ataatsimiinnerup aallartinnginnerani tunuarmat aamma sinniisoq ataaseq aggersarneqartussanngorpoq.
Inuit Ataqatigiit aamma Naleqqap Inatsisartuni gruppia qinersisartut taasaanniit allaanerungaartumik inissititertussanngorput.
Qinersisartummi Inatsisartunut 6. april qinernerpaasaat taakkuussanngillat inatsisartuni ilaasortatut aalajangiisartussat.
Inuit Ataqatigiit aamma Naleraq, Inatsisartunit 31-iusuni 16-inik ilaasortaatitaqarluni amerlanerussuteqartoq, qinikkanik arlalinnik Naalakkersuisunngortitsivoq.
Múte B. Egede (IA), Naalakkersuisut siulittaasuattut issianermini Inatsisartuni ilaasortaasussaagami tassanngaanniit sulinngiffeqarniarsinaanngilaq. Soorlu aamma Kiista Fencker (N) qinigaannginnami sulinngiffeqarniarsinnaanngitsoq. Naalakkersuisunngortulli sinneri arfineq-pingasuusut qinigaaffiup sinnerani Inatsisartunit sulinngiffeqassallutik qinnuteqarput.
Inatsisartut siulittaasuata, Hans Enoksenip Inatsisartut tallimanngornermi inissititertumik ataatsimiimmata tamanna nalunaarutigaa.
Naalakkersuisut uku Inatsisartunit sulinngiffeqassapput:
- Asii Chemnitz Narup (IA) 983-init taaneqartoq
- Mimi Karlsen (IA) 156-init taaneqartoq
- Kalistat Lund (IA) 276-init taaneqartoq
- Aqqaluaq B. Egede (IA) 1.287-init taaneqartoq
- Eqaluk Høegh (IA) 649-nit taaneqartoq
- Naaja H. Nathanielsen (IA) 422-nit taaneqartoq
- Peter Olsen (IA) 255-init taaneqartoq
- Pele Broberg (N) 550-init taaneqartoq
Naalakkersuisunngortut Inatsisartunit sulinngiffeqartarneri ileqquliunneqaleraluttuinnarpoq. Inatsisartuniilli qinigaaffimminni sulinngiffeqassanerlutik namminneerlutik aalajangertussaavaat. Taamaasiussappata sinniisut aggersarneqartussaapput.
Sinniisut uku ivertinneqarput:
- Hans Aronsen (IA) 85-init taaneqartoq
- Charlotte Pike (IA) 79-init taaneqartoq
- Pipaluk Lynge Rasmussen (IA) 63-init taaneqartoq
- Knud Mathiassen (IA) 60-init taaneqartoq
- Harald Bianco (IA) 59-init taaneqartoq
- Agathe Fontain (IA) 59-init taaneqartoq
- Mariia Simonsen (IA) 52-init taaneqartoq.
- Paneeraq Olsen (N) 99-init taaneqartoq
Kommunemi sulerusuppoq
Stine Egede Inatsisartunit piffissaligaanngitsumik sulinngiffeqarnissamik aamma qinnuteqarpoq. Taanna Kommune Kujallermi borgmesterinngussaaq. Sinniisussaq Mikivsuk P. Thomassen taamaasilluni Inatsisartuni ivertinneqarpoq. Stine Egede Inatsisartunut qinersinermi 133-nit taaneqartoq, Mikivsuk P. Thomassen 99-init taaneqartoq.
Siumut aamma sinniisumik aggersaasariaqalersimavoq. Qinersinermimi 796-init taaneqarluni qinerneqarluartoq, Qarsoq Høegh-Dam Inatsisartut inissititerlutik ataatsimiilinnginnerini tunuarniuteqarpoq. Tunuarnerminut tunngavilersuutigaa ilimagingamiuk qinigaasinnaatitaannginnissanni, ikiaroornartoq pillugu inatsimmik unioqqutitsisimasutut 2019-imi akiligassitsissimanini pissutigalugu.
Qarsoq Høegh-Dam sinnerlugu Karl Tobiassen Qaarsuneersoq Inatsisartuni issiasussanngorpoq. Taanna 111-nit taaneqarsimavoq.
Inatsisartut inissititerlutik ataatsimiilerneranni taamaasillutik ilaasortat 31-iusuni sinniisussat qulit aggersarneqareersimalerput.