Sinniisoqarfimmut pisortanngortussaq: Kalaallit Nunaat niuerfittut mikisuararsuuvoq
USA Kalaallit Nunaannik niueqateqarnerunermik pilersitsinissamik soqutiginnittorujussuuvoq, USA-p Kalaallit Nunaanni pisortatigoortumik sinniisoriligassaa oqarpoq. Apeqqutaavoq Amerikamiut tunisassiaannut soqutiginartuunersugut.
USA-p aningaasanik ikiorsiissutissai 83 millioner koruunit kiisalu Kalaallit Nunaanni sinniisoqarfimmik ammaanissamik pilersaarutai – imaluunniit Amerikamiunit erseqqissaatigineqaqattaartutut ammaaqqinnissamik pilersaarutit, tusagassiuutini Inatsisartut torsuusaanni, Naalakkersuisuni kiisalu Danmarkimi naalakkersuisuni Folketingimilu isumaliuterpassuarnik, apeqquterpassuarnik, nalilersuinerpassuarnillu pilersitsisimapput.
Tassami sunarpiaq siunertaava?
- Kalaallit Nunaannik pitsaasumik sanileqarneq aallukkusupparput, Amerikap Danmarkimi aallartitaa, Carla Sands, tusagassiuutinut arlalippassuariarluni erseqqissaassuteqartarsimavoq.
Oqaluttuarisaanermillu immikkut ilisimasalik Bo Lidegaard inerniliimmat, ikiorsiissutit piitsunut tunissutaannaasut, USA-llu soqutiginninnera Kalaallit Nunaata nunarsuarmi politikkikkut pingaarutilimmik inissisimaffeqarneranik pissuteqaannartoq, tamanna ilumuunngilaq, Amerikamiut aallartitaqarnikkut Kalaallit Nunaanni sinniisuat, Sung Choi, oqarpoq.
Lidegaard ilisarisimanngilara oqaatigisaalu atuarsimanagit, kisianni maaniipput nunamut sanilitsinnut attaveqarnerput nukittorsarniarlugu, Sung Choi AG-mut oqarpoq.
Niueqatigiinneq annertunerusoq
Qilerutit ilaatigut ilinniartitaanermut ikiuunneq aqqutigalugu nukittorsarneqassapput, Joint Committeemi tunngavigineqartutut, kisianni aamma Labradorip imartaa Atlantikullu Avannarpasissua ikaarlugit niueqatigiinnermik annertunerusumik pilersitsinikkut.
Taamaakkaluartoq Kalaallit Nunaanni niuerfik Amerikamiut sulffeqarfiinut, nalinginnaasmik naatsorsuutitigut sinneqartoornissamik pingaartitsilluartuusunut, imaaliannaagassaanngilaq.
Inuiannguuvugummi nunarujussuarmi siammarsimalluta najugaqartut. Taamaammat USA-mit nioqqutissanik maanga avammut nioqquteqartoqassappat annertuunik aningaasartuuteqartoqassaaq, USA-p Kalaallit Nunaanni sinniisoriligassaa oqarpoq.
- Inuit 56.000-it amerlanngillat; Kalaallit Nunaat niuerfittut mikisuararsuuvoq, Sung Choi AG-mut erseqqissaalluni oqarpoq.
Aviisimi AG-mi atuarnerusinnaavutit - aviisi uani pissarsiariuk: