Sinersortaat nutaanik najoqqutasssaqalerlunilu - nutaanik akigititaqalissaaq

Arctic Umiaq Line 2023-mi angallassinissaminut piareersaateqarluni akit ilusiligaanerannik nutaamik atuutsitsilissaaq, Arctic Umiaq Linemit (AUL) tusagassiorfitsigut nalunaaruteqarnermi ilisimatitsissutigineqarpoq.

Ingerlatseqatigiiffiup akit appasinnerutinniarlugit ilaasut inaannik atorluaanerunissaq anguniarpaa. Ingerlatseqatigiiffiup billetsinut akigititani 2014-imiilli aningaasat naleerukkiartornerinut naleqqussarsimanngilai, orsussamullu 2023-mi 47 procentimik qaffattussamut immikkut ittumik akilingassaqangaatsiartussaalluni.

- AUL ilaasumut ataatsimut umiarsuarmi inimik parnaartartumik ataatsimik, inummut ataatsimut timmisartumi issiavinnik sisamanik neqerooruteqarnermut assersuunneqarsinnaasumut, neqerooruteqarluni unammillersinnaanngilaq. AUL-ili
angalaqatigiit umiarsuarmi ineqatigiillutik angalanissaannik, kangerlummi illuaqqami qanigisat unnueqatiginerinut assersuunneqarsinnaasumik, neqerooruteqarsinnaavoq, Arctic Umiaq Linemi pisortaaneq Jens-Jakob Sandgreen oqarpoq.

Umiarsuaatileqatigiiffimmit akigititassat nutaat uku saqqummiunneqarput:

• Ilaasunut 1-2-nut inimut parnaartartumut billetsimut akigitinneqartoq
  +7,1%-inik qaffanneqassaaq.
• Ilaasunullu 3-4-nut inimut parnaartartumut billetsimut akigitinneqartoq -8,3%-
  inik appartinneqassaaq.
• Ilulissat Nuullu akornanni ingerlaarfimmi ilaasunut 3-4-nut inimut
  parnaartartumut billetsimut akigitinneqartoq 31%-inik apparneqassaaq.
• Qaqortoq/Narsaq – Nuuk akigitinneqartoq -23%-inik apparneqassaaq.
• Arctic Umiaq Line meeqqanut suli ukioqalinngitsunut akeqanngitsumik billetseqartitsisarpoq 1-11-nik ukiulinnut -50%-inik akikillisaasarluni, utoqqalinersialinnullu piffissami angallaviunnginnerusumi -50%-inik akikillisaasarpoq piffissamilu angallaviunerpaasumi -25%-inik akikillisaasarluni.

Jens-Jakob Sandgreenip Sermitsiaq.AG-mut ilisimatitsissutigaa, umiarsuarmi ilaasut inaanniinneq agguaqatigiissillu 128 koruuninik qaffassassoq.

Taassuma nassuiaatigaa, aaqqissuussaq nutaaq atorlugu akit agguaqatigiissillugu 1,8 procentimimik qaffakkiartornerat annikinnerpaaffianiitinneqassasoq, umiarsuarmi ilaasut inaat 239-t atorluarneqarnerussammata. Umiarsuaatileqatigiiffiup 2014-imi aningaasat naaleerukkiartornerannut akit naleqqussarsimasuuppagit, akigititat 13,8 procentinik qaffanneqarsimassagaluartut, pisortaaneq ilisimatitsivoq.

Billetsit Killilikkat aamma Eqaatsut

Arctic Umiaq Line billetsit Killilikkat aamma Eqaatsut atulersinniarpai, billetsi Killiligaq aallarfissaq nalunaaquttap akunnerinik marlunnik sioqqullugu allanngortinneqarsinnaalluni, angalanissamik taamaatitsinermi billetsip akiata affaa utertinneqarsinnaalluni takkutinngitsoornermilu akiliutinik utertitsisoqarsinnaanani. Billetsi Eqaatsoq ilaasumut ataatsimut 90 kr.-inik ilassutitut akiliutaavoq, billetsilu aallarfissaq nalunaaquttap akunnerinik marlunnik sioqqullugu allanngortinneqarsinnaalluni, angalanissamik taamaatitsinermi billetsip akia tamaat utertinneqarsinnaalluni takkutinngitsoornermilu akiliutit affaat
utertinneqarsinnaallutik.

- Aallarfissaq nalunaaquttap akunnerinik marlunnik sioqqullugu angalanissamik taamaatitsisarnerit akeqanngitsut AUL-imut ukiut tamaasa aningaasanik arfineq marlunnik kisitsisitalinnik annaasaqarfiusarput, akiliutinillu utertitsinerit kisimik pineqarput, ilaasussaraluanillu inissaqartinneqanngitsunit kaaviiaartitassaraluit matumani ilanngunneqanngillat. Taamaammat ingerlatseqatigiiffimmut pissusissamisoorpoq immikkoortunik billetseqartitsissalluni, ilaasussanut naatsorsuutigineqarsinnaasunut sunniuteqanngitsumik,” pisortaaneq Jens-Jakob Sandgreen bilitsit nutaat pillugit oqarpoq.

Arctic Umiaq Line Suitet assigiinngitsut marluk 2023-mi angalaffiusumi atulersissavai, suite ataaseq taaguuteqarluni ”Umiaq Junior Suite” ini parnaartartoq nalinginnaasoq angeqqatigalugu ”Igdlo Suite”-lu marloriaammik anginerulluni.

Umiaq Junior Suite inunnut marlunnut inimut parnaartartumut nalinginnaasumut naleqqiullugu 500 koruuninik akisuneruvoq inullu ataasiinnaappat 1.000 koruuninik
akisunerulluni, Igdlo Suitelu inunnut marlunnut inimut parnaartartumut nalinginnaasumut naleqqiullugu 1.500 koruuninik akisuneruvoq inullu ataasiinnaappat 2.000 koruuninik akisunerulluni.

Pisortaanerup neriuutiginerarpaa, suitet sulinermut atatillugu angalasunit
atorluarneqalerumaartut:

Vil hjælpe med at sprede turisme

- Kommunit tallimaasut tamaasa sapaatit akunnerata affaa atorlugu tikinneqarsinnaammata, taanna oqarpoq.

Visit Greenlandip takornariartitsisarnerup Nunatta sineriaani siammarneqarnissaanik kaammattuutigisaa Arctic Umiaq Linep suleqataaffigisinnaassallugu neriuutigaa:

- Paasissutissaatitta takutippaat sumiiffiit mikinerusut sivikitsuinnarmik tikeraarneqartartut. Ilulissat umiarsuup utimut kaajallaffigisarpaa sapaatit akunneri tamaasa tikittarlugu, illoqarfiilli amerlanerit sapaatit akunnerannut marloriarlugit tikinneqartarput. Paasissutissaatittalu takutippaat sapaatit akunnerat ataaseq illoqarfimmiinnermut sivisusoq, sapaatilli akunnerat ataaseq Nunatsinniinnissamut sivikippallaartoq. Sumiiffimmi immikkuullarissunik neqeroorutaasut piffissami sivikitsumi misigisaqarfigineqarsinnaapput, misigisassalli tamanit atorneqarsinnaasut soorlu qimussernerit, qaqqami sisorarnerit, umiatsiarnerit, SUP-it pisuttuarnerillu najukkami takornariartitsinermik inuussutissarsiuteqartut suleqatigalugit sinerissamut siammarneqarsinnaapput. Tamannalu siunissaq eqqarsaatigalugu eqqumaffiginiarparput, pisortaaneq Jens-Jakob Sandgreen oqarpoq.