fiskeri

Sinerissap qanittuani saarulliit, assagiarsuit nipisap suai akitsuusersorneqassanngillat

Sinerissap qanittuani aalisarneqarsinnaasut arlallit maanna isumalliuutinut akitsuusersuinissamut siunnersuutigineqartumut ilanngunniarunnaarpaat. Uiluinnut akitsuut siunnersuutigineqartumit appasinnerussaaq.

Sinerissap qanittuani saarullittanut, assagiarsuttanut aamma nipisat suaanut akitsuusiisoqassanngilaq. Naalakkersuisut taama isumaqarput, nammineq isumalluutit akitsuusersorneqarnissaannut inatsisissatut siunnersuumminnut allannguutissamik maanna saqqummiussipput.

Sinerissap qanittuani aalisarnermi raaja qaleraliillut kisimik akitsuusersorneqassapput. Tassani tunisat 5 procentiinik akiliisoqartassaaq.

- Sinerissamut qanittumi saarullinniarnerup, saattuarniarnerup nipisaallu suaannik aalisarnerup killeqangaatsiartut ilaatigut naapertuutinngitsumik akitsuuteqartinneqarnerat pillugu naalakkersuisooqatigiinni oqallinnerit kingunerisaannik allannguisoqarpoq, Naalakkersuisut allannguutissatut siunnersuummi taama tunngavilersuipput.

Uiluinnut akitsuut siullermik siunnersuutigineqartumit appasinnerussaaq. Minnerpaaffissaanut tunisinermi akp 5 procentianut inissinneqarluni. Naalakkersuisut saaffigineqarsimapput akitsuutissaraluaq naapertorlugu aalisarneq iluanaarutissartaqannginnissaanik paasinarsititsisunik.

Avataasiorluni raajanik, saarullinnik, qaleralinnik, assagiarsunnik, kullerinik, sarulliit arlaannik aamma suluppaakkanik aalisarnermi minnerpaamik 5 procentimik akileraartoqartassaaq. Tunisinermili akip kiilumut 17 koruunit anguppagu 17,5 procentimut qaffakkiartortinneqassaaq.

Sinerissap qanittuani pisassat ilanngunneqannginnerat, avataasiorluni aalisarnermit akitsuutip annerpaaffia 17-mit 17,5 procentimut qaffaanermit aningaasartalerneqarpoq.

Uiluiit annikinnerusumik akitsuuteqarnissaat nunap karsia naatsorsuutigisamit 1 millionit koruuninik ikinnerusunik pissarsiaqassaaq.

Allannguutit katillutik saniatigut nunap karsianut 50 millionit koruuninik isertitsissutaanissaat naatsorsuutigineqarpoq.

Aalisakkat ikerinnarsiortut soorlu avaleraasartuut akitsuummut nutaamut ilanngunneqanngikkallarput, kisianni kiilumut akitsuusersorneqarneri suli atuutsinneqarlutik.

Inatsisissatut siunnersuut ataasinngorpat naammassillugu suliarineqassaaq.

Powered by Labrador CMS