Qimusserneq
Sinerissami qimussimik unammisitsisoqartalissaaq
Kalaallit Nunaanni Qimussertartut Kattuffiat Qaanaami Tasiilamilu qimussimik unammisitsissapput apriilimi
Upernaat tamaasa Upernavimmi Kangiata Qimussersua ingerlanneqartalissaaq, Qaanaami Inugguit Qimussersua ingerlanneqartassalluni.
Taamaasilluni sinerissami qimussimik unammisitsisoqartalissaaq.
- Tasiilarmiut Qaanaarmiullu Avannaata Qimussersuanut peqataarusuttaraluarput. Kisianni qimmit qulimiguulimmut S-61-mut kisimi ilaasinnaammata tamanna piviusunngornikuunngilaq, Kalaallit Nunaanni Qimussertartut Kattuffianni siulittaasoq Mikkel Jeremiassen Sermitsiaq.AG-mut oqarpoq.
Nunatsinnut ilaapput
Tasiilarmiut Qaanaarmiullu Avannaata Qimussersuanut peqataasinnaasannginnerat pissutigalugu qimussertartut kattuffiat illoqarfinni taakkunani unammisitsisalissaaq.
- Sinerissamiittut assigiimmik atugassaqartinniarlugit unammersuaartittalissavagut, Mikkel Jeremiassen oqarpoq.
Kangiata Qimussersua Tasiilami apriilip arfineq aappaanni ingerlanneqassaaq, Qaanaami Inugguit Qimussersuat 21. april ingerlanneqassalluni.
- Soqutiginninnerput kiisalu peqataanerat takutinniarlugu unammisitsisoqarnissaa qilanaarnarpoq, Mikkel Jeremiassen.
Avannaata Qimussersua ukioq manna ukiuni 30-nngortorsiortinneqassaaq. Ilulissani marsip 24-ani Avannaata Qimussersua ingerlanneqassaaq. Unammersuaarneq kulturikkut pisoqarfiussasoq Mikkel Jeremiassen ilisimatitsivoq.