Skip to main content

Sineriammi atuarfiit ammaqqinneqassapput - timmisartut angalaqqusaannginnerat sivitsorneqarpoq

Naalakkersuisut aalajangersimapput, sineriammi atuarfiit påskereerpat ammaqqinneqassasut. Nuummi atuarfiit meeqqeriviillu kisimik pinnatik. Ilanngullugu nunami maani nunanullu allanut timmisartukkut angalaqqusaannginneq maajip aallaqqaataanut sivitsorneqarpoq.

Ullumi ataasinngornermi misissugassatut tiguneqarsimasut 30-t akissutaanni allanik tunillatsittoqarsimanngitsoq paasineqarpoq, coronallu atuunnerata ajunngitsup tungaanut ingerlalersimanissaanik isumalluartoqarluarmat, polikkikkut aalajangiunneqarsimavoq, aqunneqarsinnaanngitsumik tuniluuttoqalersinnaanera pinngitsoortinniarlugu iliuuserisimasarpassuit ilaat sakkukillineqassasut.

Sineriammi atuarfiit påskereerpat ammaqqinneqassasut

Nuummi atuarfiit suli matoqqatinneqassapput - massakkuugallartoq.

Nuummi meeqqeriviit suli matoqqatinneqassapput

Nunami maani nunanullu allanut timmisartukkut angalaqqusaannginneq maajip aallaqqaataanut sivitsorneqarpoq.

Naalakkersuisut Siulittaasuat Kim Kielsen ataasinngornermi tusagassiortunik katersortitsinermi taamatut ilisimatitsivoq.

- Nunatsinni Nakorsaanerup Politeeqarfiullu nunami angallannissamik inerteqquteqarnerup sivitsorneqarnissaanik piumaffigisimavaatigut, Kim Kielsen, illoqarfinnut allanut immitsinnut suli tiskeraartannginnisssatsinnik kaammattuisoq ilisimatitsivoq.

- Nunaqarfimmut illoqarfimmulluunniit allamut tikeraarnissaq aatsaat pisariaqavikkaangat, mianersoqqissaaraanni angalasoqarsinnaavoq, Kim Kielsen oqarpoq.

- Illoqarfimmut allamukarnissamut akuersissummik qinnuteqartoqarsinnaavoq, akuerineqassangaannili tunngavilersuilluartoqartariaqarpoq, Naalakkersuisut Siulittaasuat erseqqissaavoq.

Kim Kielsenip oqaatigiuminaatsinnerarpaa, nuna nunanut allanut angallannissamut qaqugu ammaqqinneqassanersoq, nunani allani coronap qanoq ingerlanera apeqqutaammat.

Atuarfiit

- Marlunngornermi apriilip 14-iani sineriammi illoqarfinni nunaqarfinnilu atuarfinni ilinniartitsineq aallartisaqqinneqassaaq, atuartut atuariartornerminni najugaqarfiit allat aqqutiginaveersaartassavaat pillugu peqqussutit immikkut ittut malillugit, aamma nunatsinni nakorsaanerup aarlerinartoqarsinnaaneranik naliliisimanera allannguuteqanngippat, Kim Kielsen oqarpoq.

- Pisiniarfiit ammasarnerannut tunngatillugit malittarisassat suli atuukkallassapput, Aamma centerersuarnut tunngatillugit killilersuutit attatiinnarneqassapput.

- Atuarfiit meeqqeriviillu suli matoqqatinneqarnissaat politikkikkut aalajangiunneqarpoq, Kim Kielsen ilisimatitsivoq.

Tuniluuttoqarsinnaasoq

Nunatsinni Nakorsaanerup Henrik L. Hansenip ilisimatitsissutigaa, Nuummi tuniluuttoqarsinnaasoq. Arlaannik ajortoqannginnersoq qulakkeerneqarnissaata tungaanut piffissaq sivisunerusoq atortariaqarparput, nakorsaaneq erseqqissaavoq.

-Sapinngisamik amerlanerpaat misissugassanik tigusiffigisariaqarpavut, inuppassuarnillu misissuipallassinnaangutta, inuiaqatigiinni nalinginnaasumik ingerlaqqilernissamut Naalakkersuisut suliaqarnissaannut piaarnerusumik inassuteqarfigisinnaanngussavavut, Nunarsinni Nakorsaaneq ilisimatitsivoq.

Nunatsinni nakorsaanerup sineriammi atuarfiit ammaqqinneqarnissaat ajornartoqartinngilaa.

- Kalaallit Nunaat nunatut ataatsitut assigiinnik malittarisassalittut isigineqarnissaa suli nallinngilarput.

- Ullumi inuk ataase, Kalaallit Nunaannukarnissamik pilersaaruteqartoq, Københavnimi misissugassamik tigusiffigisarput tunillatsissimasoq paasivarput, Henrik L. Hansen oqarpoq.

Kim Kielsenip erseqqissaatigaa, Tuniluuttumik nappaalanersuaqarnerani ataatsimiititaliarsuup politikkikkut aalajangiunneqartut soorunami akuereqqaartartussaagai.

Imigassaq Nuummi suli inerteqqutaassasoq

Imigassamik inerteqquteqarneq pillugu apeqquteqartoqarmat oqaatigineqarpoq, Nuummi imigassap inerteqqutaanerata sivitsorneqarsinnaara pillugu aalajangiisoqarsimanngitsoq. Inerteqquteqarneq taamaalilluni apriilip 18-iata tungaanut suli atuuppoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER