Simon Lynge guitareqqissinnaanngorpoq
Nipilersortartoq Simon Lynge assamigut ajutooreernermi kingorna nipilersoqqissinnaanngorpoq
Simon Lynge Danmarkimi guitariutigaluni tusarnaartitsissaaq sapaatip akunnerata tulliani.
Juunip 20-ani assamigut ikilerujussuarpoq, nipilersortartullu guitarersinnaajunnaarsinnaanini ernumagisimagaluarpaa.
Maannali nuannersumik nutaarsiassaqarpoq. Simon Lynge guitarertaleqqinnissani sulissutigisimavaa, tamannalu Facebookimini saqqummiullugu. Tallimanngorpat saqqummertussaq 'Age og Distraction' atoraa takuneqarsinnaavoq.
Nipilersukkani naammassigamiuk Simon Lynge qungujulluni oqaaseqarpoq:
- Neriuppunga tusarnaartitsileruma najuukkumaartusi, tassami akunnerit tallimat atorlugit guitarerneq sungiunniarsarinikuuara ullut tamaasa.
- Unali suli ajornartilaarpara, Simon Lynge suna suli ajornartinnerlugu takutippaa.
- Qujanartumik suli guitarersinnaavunga, neriuppunga takussallutit.
Simon Lynge Kalaallit Illuanni Københavnimi 12. september tusarnaartitsissaaq, Koldingimi 'Godset'-imi 13-ani kiisalu Assensip kulturikkut illorsuani 15-ani.