Sillimaniarnermut politikkikkut isumaqatiginninniarnerit qaammammi matumani aallartinneqassasut

Naalakkersuisut Kalaallit Nunaanni nunanut allanut sillimaniarnermullu politikkissaq pillugu Inatsisartuni partiit amerlanerussuteqartut isumaqatigiissuteqarfigineqarnissaat sapinngisaminnik anguniarniarpaat.

Danmarkimi naalakkersuisut Kunngeqarfiup illersornissamut missingersuutai milliardilikkaanik amerliniarpaat, naatsorsuutigineqarporlu aningaasat ilaat Issittumi atorneqassasut.

Tassunga atatillugu kalaallit Folketingimi ilaasortaatitaasa Kalaallit Nunaanni sillimaniarnermut politikki pillugu qanoq isumaqartoqarnersoq pillugu isumaqatigiittoqarnissaa ujartorpaat, Naalakkersuisut Danmarkimi naalakkersuisunik isumaqatiginninniarnissamut piareersimaniassammata.

Naalakkersuisullumi amerlanerpaat isumaqatigiissuteqarfigineqarnissaat sapinngisaminnik anguniarniaraat, Naalakkersuisut Siulittaasuata Múte B. Egedep Sermitsiaq.AG-mut oqaatigaa:

- Tamanna qitiulluinnarpoq avaqqunneqarsinnaananilu. Amerlanerpaat isumaqatigiissuteqarfigineqarnissaat sapinngisarput tamaat anguniassavarput. Ullumikkorpiaq pisut eqqarsaatigalugi piareersimasariaqarpugut, aamma nunanut allanut sillimaniarnermullu politikkimi ataatsimoorussamik tunngaveqarnitsigut piareersimarusuppugut, Naalakkersuisut siulittaasuat oqarpoq.

Sillimaniarnermut nunanullu allanut politikkipillugu Inatsisartuni partiinik isumaqatiginninniarneq qaammammi matumani aallartinneqassasoq oqaatigineqarpoq:

Ataatsimut tunngaveqarnissaq pingaaruteqartoq

- Nunanut allanut sillimaniarnermullu politikki pillugu Inatsisartuni partiinik isumaqatiginninniarneq martsip qaammataata naanerani aallartissavarput. Ataatsimut tunngaveqarnissarput pingaaruteqarpoq. Kalaallit Nunaanni nunanut allanut politikkeqarnerput pillugu partiillu ataatsimoorussaqarnissarput pingaaruteqarpoq.

- Taamaalilluta avataanit nukittunerorpasittutut isikkoqalissaagut. Isumaqatigiissutigisinnaasavut nassaarisariaqarpavut. Nunarsuarmi ullumikkut pissutsit sapaatip-akunnerini kingullerni takusavut nutaat eqqarsaatigalugit tamanna pingaaruteqarpoq, tassa Ukraineq pissutissaqanngitsumik saassunneqarmat, Múte B. Egede oqarpoq.

Siulittaasup oqaatigaa, Naalakkersuisut naalakkersuisooqatigiinnissamik isumaqatigiissutaanni tunngaviusoq, Issittumi sakkulersortoqannginnissaa.

Apeqqut: Ukrainemi pisoq eqqarsaatigalugu sakkulersortoqannginnissaa suli piviusorsiopa. Ruslandimmi nuna eqqaminiittoq saassuppaa, Ruslandilu Issittumi Kalaallit Nunaannut saniliulluni?

Nunarsuarmi pisoq nutaaq Kalaallit Nunaannut tatisisoq

- Ukiumi 2022-mi nuna nunap allap oqartussaassuseqarneranut namminerlu aalajangiisinnaassuseqarneranut ataqqinninngitsoq soorunam eqqarsalersitsivoq. Nunarsuarmi pisuni tamanna nutaajuvoq. Kalaallit Nunaanni oqartussaanissarput nammineerlutalu aalajangiisinnaassuseqarnissarput ukiorpassuarni sorsuutigisimavarput, naleqartitanillu ataqqinninngittoqarnera eqqarsalersitsilluni.

- Taamaammat Kalaallit Nunaanni erseqqissumik isummertariaqarlutalu isumaqatigiissuteqartariaqarpugut. Nunat tamalaat aamma naleqartitatik nunaminni inuiaqatigiinnut tunngaviusut aalajangiussimasariaqarpaat. Tassa oqartussaaqataanermik nunallu nammineersinnaassusaannik ataqqinninneq, Múte B. Egede oqarpoq.

Powered by Labrador CMS