silap pissusia

Silatta iliuuseqarnissamik pinngitsaalivaatigut

Ilinniarsimallutik sulisut Nunatsinneersut nunanilu allaneersut Pinngortitaleriffimmi naapeqatigeeqqammerput

- Silatta pissusiata allanngornerujussua assortorneqarsinnaanngilaq, tamannalu ukiorpassuarni kingullerni ilisimatuussutsikkut nalunaarusiarpassuarnit uppernarsarneqarluni naqissuserneqaqattaareerpoq. Nunatta kitaata kujataa ukiuni 200-ni kingullerni aatsaat taamak kiatsigaaq, kissatsikkiartorneruneralu inuit pilersitaannik aallaaveqarpoq. Silattalu unammillermatigut sussaagut, imaluunniit allat oqarniassapput, nammineq pisuulluta tassunga killikkatta sussaagut taava?

Pinngortitaleriffimmi paasiniaaqatigiittoqarnerani taama apererpasissumik aallarniuteqartoqarpoq.

Nunarput Issittorlumi tamarmi silap pissusiata allanngorneranit sutigut tamatigut unammillerneqarpoq, allannguuterpassuillu inuuffigisavut malunniuteqaqisullu naleqqussarfiginiarlugit suliassaqarfikkuutaat amerlanerpaat iliuuseqarnissami peqataatinneqartariaqarput.

Qulequttat tamakkuupput Pinngortitaleriffimmi pingasunngormat sisamanngormallu nunatsinneersut canadameersullu ataatsimoorullugu iliuuseqarniarnissaq anguniarlugu pilersaarusioqatigiissut suliniummik AACA-mik taallugu ingerlataqartut ataatsimeeqatigiinneranni sammineqartut. AACA naalisagaavoq Adaptation Actions for a Changing Arctic-imit isumaqartoq Issittumut allanngoriartortumut naleqqussarnissaq.

AACA Issittumi Siunnersuisooqatigiit ataanni suliniutaavoq nutaaq paasissutissanik ilisimariikkanik katersisinnarluni aalajangiisartunut saaffiginnittumik nalunaarusiortussaq.

Soqutigisaqaqatigiikkuutaat suliniummi ilaatinneqarnerat pingaartuuvoq, tassami saaffigineqartuuginnaratik immersueqataammata. Taamaalilluni ataatsimiinnermi matumani immersuutigisaasa nalunaarusiassami qanoq atorneqarnissaattaaq ilanngullugu eqqartorneqarpoq.

Peqataasut
Pinngortitaleriffimmi ataatsimiinneq AACA-p nunatsinni pisortatigoortumik ingerlalerneranik aallarniineruvoq, tassani AACA-p ataani suliaqartut nunatsinneersut, Canadameersut, Danmarkimeersut Norgemeersullu nunatsinni suliassaqarfikkuutaartut aallartitaannik isumasiuineralugu siulleq.

Suliniut 2017-p tungaanut ingerlanneqassaaq nunatsinnilu aatsitassarsiornermik ikummatissiornermillu, aalisarnermik inuussutissarsiortut, soqutigisaqaqatigiiffiit soorlu ICC, KNAPK aamma GA-kkutullu ittut aallartitaat aammalumi Namminersorlutik Oqartussani atorfillit ataatsimeeqatigineqarput.

Powered by Labrador CMS