Silarlunnerani angalaffissaanngitsoq: AWG-mi timersortartut allallu apuunniarlugit Air Greenland ulapputeqartoq
Norsaq tallimanngorpat Kangerlussuarmit Canadamut Arctic Winter Gameserfiusussamut aallassaaq. Ulluni qaangiuttuni taamaatitsiinnarnerit angummanniarfiginerisa saniatigut timersortartut, sungiusaasut allallu Kangerlussuarmut tikinnissaat Air Greenlandip ilungersuutigai.
Sapaatip akunnerani matumani timmisartumik maannamut angallassiffissaarpianngilaq. Ilaatigut nittaalarnera aamma Kitaata sineriaani pingasunngornermi anorersuarnera pissutigalugit, Air Greenland aammattaaq angallassinissanik arlalissuarnik taamaatitsiinnartariaqarsimavoq.
Ataasinngormalli angalasut 842-t silarlunneranit eqqugaasimasut, Air Greenland ilisimatitsivoq. Taamaatitsinerit aamma kinguaattoornerit nunarput tamakkerlugu assigiingajammik agguataarsimapput, amerlanerulaartut Avannaani aamma Tunumiillutik.
AWG-mut atatillugu suliassarujussuaq
Air Greenland ulluni makkunani aammattaaq nalinginnaanngitsumik annertuumik suliassaqarpoq, timmisartortitseqatigiiffik Arctic Winter Gamesip ingerlanneqarneranut atatillugu Timersoqatigiit Kattuffiannut pingaarnertut aningaasaliisuugami.
Tassami timersortartut, sungiusaasut tikeraartussallu allat AWG-mut angalasussat Kangerlussuarmi katersuutsinneqassapput, tallimanngornermilu Norsamut ilaallutik Canadamut angalassapput.
- Ilaasutta allat sullinneqarneri assigalugit, soorunami sapinngisatsinnik inuit angallanniarsaraagut, taamaalillutik Arctic Winter Gameseriarlutik aallarsinnaaniassammata, Air Greenlandimi attaveqatigiinnermut pisortaq, Katja Vahl oqarpoq.
Air Greenlandip aningaasaliisuunermut isumaqatigiissutaa 1,7 millionit koruuninik naleqarpoq, taamaalillunilu Air Greenlandip ukiuni kingullerni aningaasaliisuunermut isumaqatigiissutaani annertunerpaavoq.
Silarlunnera suli akornusersuivoq
Sisamanngornermi sila suli akornusersuivoq, Mittarfeqarfiit mittarfiit ilaanni sermiiaanissartik ajornakusoortimmassuk. Katja Vahl taama oqaluttuarpoq.
Air Greenlandip sulisui ilaasunik kinguaattooqqasunik sisamanngornermilu aallartussanik angallassiniarlutik ulapputeqarput, kisianni pilersaarutit silap akornuseqqissinnaavai:
- Nittaalarnera pissutigalugu tassanngaannaq ersarlulertarpoq, taamaaligaangat qangattarsinnaanatalu missinnaanngilagut, taanna oqarpoq.