silarluk
Silarloqqilernera kinguaattoorutaavoq
Nuummi anorlerpallaarnera pissutigalugu ataasinngornermi ullaap tungaa timmisartunik qangattartoqarsinnaananilu mittoqarsinnaanngikkallarpoq
Nuummi ataasinngornerup ullaap tungaa anoraasuanerit 30 sekund meteriusarput. Illoqarfinni arlalinni aamma timmisartut kinguaattoorput. Air Greenlandimit sila atoruminarsiiminissaa utaqqimaarneqarpoq.
Ilaasut 120-it Nuummeersut Sisimiuneersullu 24-it ataasinngornermi ullaap tungaa Kangerlussuarmukarniaraluarlutik saperngupput. Nuummili anori sakkortuallaarmat Air Greenlandip timmisartuutai uninngagallarput.
- Nuummi anori timmisartuussinissamut killigititaasumit sakkortuneruvoq, maanna piareersimaannarallarpugut anori sakkukilliiminiariarpat timmisartuussinerit aallarteqqinnissaannut, Air Greenlandimi attaveqarnermut pisortaq Pia Christensen Bang Sermitsiaq.AG-mut oqarpoq.
Neriuutissaqarporli. DMIp ilimasaarutaa malillugu anori ullup qiteqqunneraniit sakkukilliartortussaavoq. Timmisartorsuup Norsap Kangerlussuarmiit aallarnissaa marlup qeqqanut kinguartinneqarallarpoq. Kinguartinerusinnaanngilaalli timmisartumi inuttat nalunaaquttap akunneri suliffigisinnaassaat pillugit malittarisassat malinneqartariaqarmata.
Bell 212 kujataani teknikkikkut ajornartorsiuteqarpoq, taamaammat kujataani timmisartuussineq kinguaattooqqasoq, Air Greenland nalunaarpoq.
Qaarsuniit timmisartuussinissaq aamma marlunngornermut kinguartinneqarpoq.