Hot

Silap pissusianik ilisimatusarfik ´iluatsilluaqisoq´

Ilisimatusarnermut Naalakkersuisup kakkaginneqisup Nick Nielsenip Kalaallit Nunaanni Silap Pissusianik Ilisimatusarfiup naggataajusumik katerisimaartitsinera ammarpaa

Nuummi Silap Pissusianik Ilisimatusarfik ukiualunnguit ingerlanerinnaanni ilisimatusarfinngorsimavoq nunani tamalaani tusaamasaasoq. Tamanna naalakkersuisunut ilaasortap Nick Nielsenip nuannaarutigaa.

– Naalakkerlsuisuni tulluusimaarutigeqaarput Silap Pissusianik Ilisimatusarfimmi ukiualunnguit ingerlanerinnaanni Kalaallit Nunaanni silap pissusianik ilisimatusarfimmik nunani tamalaani akuerineqartumik pilersitsisinnaasimagassi. Ilisimatusarfimmik ineriartortitsisimasuvi professorinik, ilisimatuunik ilinniagaqartunillu tamakkiisumik sulisulimmik aammalu ilisimatuunut ilinniagaqartunullu attavippassualimmik, Nick Nielsen oqarpoq.
Tamanna pivoq Nuummi isumasioqatigiinnermi, tassami ilisimatuut 60-it nunanit assigiinngitsunit 15-ineersut katersuussimasut, silap pissusianik ilisimatusarfimmi, Nuummi Pinngortitaleriffimmiittumi, anguniagalimmik ilisimatusarnermi angusat oqaloqatigiissutigalugit.
Kalaallit Nunaanni Silap Pissusianik Ilisimatusarfik ilisimatussutsit akimorlugit centeriuvoq silap pissusiata allanngoriartornerata issittumi pinngortitamut issittumilu inuiaqatigiinnut sunniutaanik samminnittoq. Ilisimatusarfittut centerimi suliniutit 20-t sinnillit aallartinneqarsimapput, ilaatigut samminnittunik immap sikuata pissusilersornerata sunniutaanik, immap sarfaannut aalisarnermilu allannguutinut aammalu issittumi innuttaasut inuuniarnermi atugarisaannut.
Pinngortitaleriffiup pisortaata Klaus Nygaardip Silap pissusianik ilisimatusarfik aamma taavaa ´iluatsilluartorujussuartut´, tikkuarlugulu ilisimatusarnermik suliniutini angusat naleqassuserujussuat - inuiaqatigiinnut kalaallinuinnaanngitsoq issittumulli tamarmut.
Ilisimatusarnermut naalakkersuisup Nick Nielsenip erseqqissarpaa suliat kakkagisorujussuullugit, oqaatigalugulu Namminersorlutik Oqartussat Ilisimatusarnermut inatsit akuersissutigeqqammeraat - Nunatta oqaluttuarisaanerani siulleq. Tamatumuunakkut neriunarpoq ilisimatusarnermik suliniuterpassuit silap pissusianik ilisimatusarfimmi aallartinneqarsimasut suliniutillu arlallit allat ingerlateqqinneqarsinnaassasut.
Ilisimatoorpassuit oqaloqatigiissutigaat issittumi ilisimatusarnermi siunissami suliniuteqarfissatut periarfissat, ataatsimullu allakkialiorlutik qallunaat nunaanni nunatsinnilu aalajangiisartunut.

Powered by Labrador CMS