Silap pissusaata allanngoriartornerata malitsigisaanik aasiaqarnerulissasoq
Nutaamik misissuisoqarsimanerata takutippaa, silap pissusaata allanngoriartornera pissutigalugu, Issittumi aasiaat sukkanerusumik kinguaassiulersinnaasut.
Qaqqami pisuttuarninni nalinginnaasumit uumasuaraqarnerusorikku, taava imaassinnaavoq aasiaat amerlisimanerannik tamanna pissuteqartoq.
Ilisimatuut ukiut 20-t kingulliit ingerlaneranni Tunumi ilisimatusarfimmi Zackenbergimi aasiannik katersisarsimapput, misissuisarnerillu maanna takutippaat, silap pissusaata allanngoriartorneratigut aassiaat sukkanerusumik kinguaassiorsinnaanngorsimasut.
Aasiappassuit ukiumut marloriarlutik kinguaassiorsinnaanngorsimapput, siornatigut ukiumut ataasiaannartaraluarlutik. Arhus Universitetimi Arktisk Forskningscenter og Institut for Bioscience tusagassiorfinnut nalunaaruteqarnermi allappoq.
- Taamatut kinguaassiorsinnaanerat siusinnerusukkut takuneqarsimanngilaq, silalli allanngoriartornera issittumi sullinernut aasiannullu sunniuteqarsimavoq, ilisimatooq misissuinermilu siuttuusimavoq Toke T. Høye oqarpoq.
Pinngortitami ataqatigiittoqarneranut sunniuteqassanersoq ilisimaneqanngitsoq
Aasiaat inuusaasiisa allanngornerat, silap pissusaata allanngoriartorneranit pissuteqartumik pissutsinut nutaanut naleqqussarsinnaanertut ilisimatuunit isigineqarpoq.
Ilisimatuunilli oqaatigiuminaatsinneqarpoq, aasiaqarnerulerniarpasinnera pinngortitami ataqatigiittoqarneranut qanoq sunniueqassanersoq:
- Maannakkorpiaq eqqoriaannarsinnaavarput pinngortitami ataqatigiittoqarnera qanoq allanngorsinnaanersoq, paasivarpulli nunarsuarmi silap kissatsikkiartornerata issittumi pinngortitap ataqatigiinneranut sunniuteqarneranik paasinnissagutta, uumassusillit kinguaassiortarnerisa allanngortarnerannik aamma isiginninnissarput, Toke T. Høye oqarpoq.
Ilisimatusarnermi paasisat nutaat Proceedings of the Royal Society B-mi saqqummiunneqarsimapput.