Silap pissusaanut tunngatillugu pissanganartuliaq Nûkaka Coster-Waldaurimk Angunnguaq Larsenimillu inuttaqartoq

'Tynd Is' pillugu TV-kkut nangeqattaartuliaq sapaatiuppat DR1-ikkut aallakaateqqaarneqassaaq

Tynd Is' pillugu TV-kkut nangeqattaartuliap immikkoortua siulleq sapaatiuppat DR1-ikkut aallakaatinneqassaaq.

Nangeqattaartuliami kalaallit isiginnaartitsisartut arlallit peqataapput. Nûkaka Coster-Waldauip Angunnguaq Larsenillu saniatigut Qillannguaq Berthelsen, Hans Jukku Noahsen, Nivi Pedersen, Kimmernaq Kjeldsen aamma Maasi Inuk Pedersen ilaatigut peqataapput.

Pissanganartuliaq Kalaallit Nunaanni pisuusaartitaq silap pissusaata allanngoriartorneranik tunngaveqarpoq.

Umiarsuaq ilisimatusarnermi atorneqartartoq Kalaallit Nunaat sineriaata avataani tiguarneqarpoq. Peqatigitillugu Issittumi Siunnersuisoqatigiit Issittumi uulisiornissamut inerteqquteqarneq pillugu Tunumi ataatsimiipput.

- Tuulluussimaarutigisupilussuuara taamatut suliaqarnermut arlalitsigut peqataasimangama, Nûkaka Coster-Waldau facbookikkut allappoq.

Isummat pigiliutiinnakkat

Nangeqattaartuliaq Søren Stærmosemit aamma Kidda Rokkimit suliarineqarsimavoq. Silap pissusaata allanngoriartornera pillugu sammisap saniatigut, kalaallinut tunngatillugit dansknit isummat pigiliutiinnakkat aamma sammineqarput. Tamanna ilaatigut danskit nunanut allanut ministerianit Martin Overgaardimit, Nicholas Bromit inuttaaffigineqartumit saqqummiunneqarpoq.

- Filmimik suliaqartut Søren Stærmose aamma Kidda Rokk marluullutik inutsialaapput inoqamminnut uummatillit, filmiliornermik inuussutissarsiuteqartunut akuunerat qujamasuutigeqaara, aamma pingaarutilinnik qaammarsaaqataallutillu isummanik pigiliutiinnakkanik kipititseqataanerat qujamasuutigeqaara, inuit taakkutut ittut suliaqarfimmi oqimaatsumi, isumassarsinermiit ukiorpassuit ingerlaneranni TV-kkut aallakaatitassiorluni piviusunngortitsiniarfiusartumi pinngitsoorneqarsinnaanngillat, Nûkaka Coster-Waldau allappoq, nangillunilu

- Kalaallit Nunaanni silap pissusaata allanngoriartornera pillugu arfineq-pingasunik immikkoortortalimmik filmiliornissamut inuit pitsaanerpaat nassaarineqarsimapput.

Nangeqattaartuliaq Sverigemi, Norgemi, Finlandimi, Islandimi kiisalu aallakaatitsisarfimmi C Moremi takutinneqareersoq maanna DR-kkut takutinneqartussanngorpoq.

Powered by Labrador CMS