Nuummi Cop21
Silap kissatsikkiartornera millisinniarlugu Nunarput naammattumik iliuuseqarpa?
IA Folketingemi, WWF, ILI ILI aamma Ilisimatusarfik sila pillugu oqallinnissamut qaaqqusipput
Kalaallit Nunaat silap pissusiata allanngoriartorneranut nammineerluni qanoq iliuuseqarsinnaava?
Aamma ullumikkut iliuutsivut naammappat?
Apeqqutit taama ittut tallimanngorpat decemberip aqqarnanni Ilimmarfimmi inersuarmi atuartitsivimmi oqallisigineqassapput, IA Folketingemi, WWF, ilinniartut peqatigiiffiat ILI ILI aamma Ilisimatusarfik sila pillugu oqallitsitsinissamut qaaqqusineranni.
Pinngortitaq inuuffigaat
Aaqqissuisut erseqqissarpaat, silap pissusia kalaallinut pingaarnerpaat ilaanniittutut taaneqarsinnaasoq, pinngortitaq qanimut inuuffigigamikku. Assersuutigalugu nunani issittuni allanngoriartorneq malugineqarsinnaanerujussuuvoq Europamut sanilliutissagaanni.
Taamaattumik aaqqissuussisut tamarmiullutik inuit takkunnissaannut innersuukkusuppaat oqalleqataajartoqqullugit. Ilisimatusarfimmi COP21-mi Parisimi ataatsimeersuartoqarneranut atatillugu oqallinnissap siunertaaraa, iluarsiissutaasinnaasut unammillernartullu silap allanngoriartorneranit Kalaallit Nunaanni qanoq qisuariarfigineqarsinnaanerinik oqallinnissaq.
Allanngoriartornerit malugigaat
- Parisimiinnaanngitsoq kisianni aamma Kalaallit Nunaanni silap allanngoriartornera oqallisigissallugu pingaaruteqarpoq. Qularnanngilaq sermersuup aakkiartorneranit kingunipiluit nunarsuatsinnut sunniuteqarnissaat, kisianni uagut inuiattut ikittunnguugaluarluta qanoq iliuuseqarsinnaavugut? Uagut nunatsinni silaannap allanngoriartorneranik takusinnaalluaqisagut nunarsuarmioqatitsinnut qanoq paasitinniassavagut? oqallinnermut aaqqissueqataasut ilaat, folketingimi Issittormiut inatsisartuisa ataatsimiititaliaani sinniisoq, folketingimut ilaasortaq Aaja Chemnitz Larsen (IA) aperivoq.