Sikuunerani Sarfaq Ittuk killilimmik angalassaaq
Kitaa sikusimammat Sarfaq Ittuk ukioq manna angalalluni aallartikkuni Maniitsumiit kujammut Qaqortoq tikillugu taamaallaat angalassaaq.
Sisimiuniit angalasussat Sarfaq Ittuk tallimanngorpat 25. marts angalalerpat ilaasinnaassanngikkallarput.
Arctic Umiaq Line taama naatsumik nalunaaruteqarpoq.
Kitaata sikusimanera pissutigalugu ukiup taamaalinerani nalinginnaasumik angallavigineqartartoq, tassa Sisimiuniit kujammut Qaqortup tungaanut, malinnagu, Maniitsup Qaqortullu akornanni angalasoqarallassaaq.
- Ukiup taamaalinerani naliginnaasuugaluarpoq avannamut Sisimiut tikillugu Sarfaq Ittuup angalasarnera, sikuli peqqutaalluni sapaatip akunnerata una Kangaamiut Sisimiullu tikinneqarsinnaanngillat, angalatitsivik ilisimatitsivoq.
Angalasussat aallarsinnaajunnaartut Arctic Umiaq Linemut saaffiginneqquneqarput.
Siku killiliivoq
Sarfaq Ittuk sikumit kisimi killilerneqanngilaq. Mary Arctica Qeqertarsuup Tunuanut angalaniarneri pingasoriarluni taamaatittariaqarsimavaa, sikup issuallaarnera pissutigalugu.
Mary Arcticali Sisimiunut angalasinnaasimavoq, sakkortunerusunik motoreqarami sikusiorsinnaanerullunilu.