Sikuki: Saqitsaassut akisooq ukiut sisamassaanni suli ingerlasoq
Sikuki Nuuk Harbour Nuummi atlantikukkoortaatinut umiarsualiviliorsimasumut Per Aarsleff Grønlandimut ukiuni sisimangajanni saqitsaassuteqarsimangaluartoq, tamanna suli aaqqiiffigineqarniarpasinngilaq.
Ukioq 2016/17 Nuummi atlantikukkoortaatinut umiarsualiviorneq qaammatinik qulinik kinguaattoorsimasoq, Namminersorlutik Oqartussat ingerlatseqatigiiffiutaata Sikuki Nuuk Harbourip sanasumut Per Aarsleff Grønlandimut suli akisoqisumik saqitsaassutigaa.
Umiarsualiviliutileqatigiiffiup siulersuisuini siulittaasup Lars Karlssonip Sermitsiaq.AG-mut ilisimatitsissutigaa, eqqartuussivitsigut isumaqatigiissitsiniarneq aappaagu aatsaat naammassineqassasoq naatsorsuutigineqartoq.
- Sikuki umiarsualiviup tunniunneqarnissaa kingusinaarmalli isumaqatigiissitsiniarnissamut piareersarnermi aningaasarpassuarnik atuisimavoq, naatsorsuutigineqarporlu 2022-p aallartinnerani aalajangiisoqassasoq, siulersuisut siulittaasuat Sverigemi najugaqarfimminit mailikkut ilisimatitsivoq.
Saqitsaassutigineqartoq
Sikuki Nuuk Harbourip atlantikukkoortaatinut umiarsualivissap 2016-imi novembarip qaammataani piareersimasussaagaluartup 2017-imi aggustusip qaammataani aatsaat naammassineqarnera naammaginngilluinarsimavaa. Ingerlatseqatigiiffik taamaammaat kingusinaarluni tunniusisoqarnerani ullormut akiliuteqartoqarnissaa piumasarisimavaa. Akerlianik Per Aarsleffip tunniussinissamut piffissap kinguartinneqarnissaa immikkut akiliuteqartoqarnissaa piumasarisimallugu.
Namminersorlutik Oqartussat ingerlatseqatigiiffiutaa sulliamut atatillugu immikkut aningaasartuuteqangaatsiareersimavoq, piumasaqaatinilu tamanut saqqummiunneqanngisaannarsimasut taperserneqanngippata aningaasaqarnermigut suli artukkeqqinneqarsinnaalluni.
Umiarsuit takornariartaatit annaasaqarfiusimasut
Coronap tuniluunnerata umiarsuarnik takornariartitsisartut immikkut ittumik eqqorsimavai, umiarsuit 2020-mi Kalaallit Nunaannut tikinnissatik tamaasa taamaatiinnarsimavaat. Tamanna umiarsualiviliutileqatigiiffimmut akisusimaqaaq, umiarsualivimmiinnermimi isertitassaraluit to millioner koruunit missaanniittut annaaneqarsimapput, Lars Karlsson ilisimatitsivoq.
- Taamaattoq Royal Arctic Linep aamma Eimskipip suleqatigiilersimaneranni kiisalu kilisaatit usigiarneqartarneranni suliaqarnerulerlutalu tunisaqarnerulersimavugut, siulersuisut siulittaasuat Sermitsiaq.AG-mut oqarpoq.
Namminersorlutik Oqartussat umiarsualiviliutileqatigiiffiat juunip arfineq-pingajuanni ataatsimeersuassaaq, tassani ukiumoortumik naatsorsuutit saqqummiunneqassallutik.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...