Skip to main content

Sikukimi pisortaq nutaaq

Nunatsinni umiarsualiveqarnermik ingerlatsinermi ilisarisimaneqartumi Pall Hermannsson oktobarip 20-ani paarlanneqassaaq

John Rasmussen 54-nik ukioqartoq, Sikuki Nuuk Harbour A/S-imi pisortanngussaaq.

John Rasmussen ukiorpassuarni Royal Arctic Linemi pisortap tulliatut inissisimasimavoq aammalu siusinnerusukkut Sikuki Nuuk Harbourimi siulersuisuni ilaasortaasimalluni.

Atuaruk: Sikuki Nuuk Harbour A/S nutaamik pisortartaarpoq

MIsilittagartooq
Siulersuisut toqqaanerat misilittagartuumut tuppoq

- Siulersuisunut pingaartuusimavoq eqqortumik toqqaanissaq. Inuttassarsiuussisartullu pisumi matumani atorneqarput, taakkulu siulersuisunut inunnik piukkunnartunik saqqummiussuisimapput, siulersuisuni siulittaasoq Lars Karlsson oqarpoq.

- John nunarsuaq tamakkerlugu shippingimut, terminalinik umiarsualivinnillu ingerlatsinernik misilittagaqarpoq aammalu ukiuni 25-inngulersuni Kalaallit Nunaanni sulisimalluni, taamaattumillu Johnimik ilisarisimannittut natsorsuutigisimavaat toqqagassat akornanni toqqassallugu eqqortuusoq.

Siulersuisut isumaqatigiittut
Tunuliaqutigisat, misilittakkat attaveqarnerlu aaliangiilluinnartuulerput siulersuisut isumaqatigiissut John Rasmussen, sivisuumik inuttassarsiuineq pereersorlu, aalingiummassuk. Inuttassarsiuussinerullumi innerlanerani piukkussat ilai arlaleriarlutik oqaloqatigineqartarsimapput.

John Rasmussen Aarhusimi shippingmanditut naammassisimavoq ukioq 1986. Sulileramilu aallartiffigisimavaa amerikamiut umiarsuaatileqatigiiffiat Sealand Service Inc, ilaatigut taanna Hollandimi sullissimallugu.

Atorfiit arlallit
1993-imi John Kalaallit Nunaannukarpoq tassani Royal Arctic Line suliffigilerlugu, ilaatigut Nuummi umiarsualivimmi pisortatut, umiarsualivimmi sullissinermi pisortatut kingusinnerusukkullu COO-tut umiarsualiviit akisussaaffigalugit.

Januar 2016 ISS Grønland A/S-imut nuuppoq, taassuma qanittukkut suliffeqarfittut tunineqarnerata tungaanut.

Atuaruk: Nunatsinni umiarsualiviit ingerlanneqarneranni piffik nutaaq aallartilerpoq

- Sulilernissara qilanaarivara. Isertuutissanngilarami Nuummi umiarsualiviup allilernissaa Royal Arctic Lineimi ukiorpaalunni ulapaarnerma nalaani assut kissaatigisimagakku, John Rasmussen suliassani nutaat pillugit oqarpoq.

- Isumaqarpunga Qeqertani nutaamik umiarsualiviliornissamik Inatsisartut 2013-imi aaliangiussinerat isumatusaarnerusoq, taamatut sanaartornikkut umiarsualivimmik atuisut sullinnerini sinaakkutit periarfissiissutaasinnaasullu qaffasissumiitinneqalerlutik.

Pall Hermannsson taarseraa
John Rasmussenip taarsissavaa Islandimiu piginneqatigiiffiup Nuummi umiarsualiveqarneq piusoq tigunerani aammalu nutaamik terminaliliortoqarnerani pisortaasoq.

- Siulersuisunit Pall Hermansson annertuumik qutsavigaarput. Taassumami pisortaanerani umiarsualivittaassaaq maanna naammassineqangajalersoq piviusunngortussanngortinneqarpoq, Lars Karlsson pisortaq tunualersoq pillugu oqarpoq.

- Maannalu imminut napatilluni umiarsualiveqarneq siullerpaamik atuutilersinneqarpoq, Nuummilu umiarsua livimmik tigusineq suliaavoq imaannaangitsoq. Aallartilluarpugulli Pallilu piffissalersuinerit malillugit pitsaasumik ingerlatsisimavoq, taanna oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER