Sikuki sinneqartuugaatsiarpoq – siulittaasoq taarserneqarpoq

Sikuki Nuuk Harbour 2021-mi akileraarutit suli peernagit 16,2 millioner koruuninik sinneqartooruteqarsimavoq.

2021-mi kaaviiaartitat 2,4 millioner koruunit missaannik amerlisimapput, namminerlu aningaasaatai 138 millioner koruuninngorlutik amerlisimallutik. Siulersuisut angusanik naammagisimaarinnipput.

2021-mi umiarsuartigut takornariartoqanngikkaluartoq, angusarissaarluarsimavoq:

Umiarsuarnik takornariartitsisartunik suli tikittoqanngitsoq

- 2021-mi 2020-misulli Covid-19-ip malitsigisaanik umiarsuartigut takornarianit isertitaqartoqarsimanngilaq, isertitarineqanngitsoortulli susassaqarfinni allani suliaqarnerusimanermit, tassunga ilanngullugu ukiuunerani umiarsuit talinnganerunerannit kiisalu nioqqutissat containerineersut akiinit, kilisaatit talinnganerannit assartukkallu poortorneqarsimanngitsut akiinit matussuserneqarsinnaasimapput, ingerlatseqatigiiffiup siulersuisuinit nalunaarusiami allassimavoq.

Nalunaarusiami aamma allassimavoq, 2021-mi sineriammut qanittumi aalisarnermit tunisat 2019-imi tunisarineqarsimasunut sanilliullugu 50 procentimik annikinnerusimasut:

- Tamanna ingerlatseqatigiiffiup isertitaanut sunniutqarsimanngilaq, ataatsimulli isigalugit inuussutissarsiutip pineqartup tatineqarsimanerata kinguneranik tunisinermi isertitat annikillisimallutik, Sikukimi siulersuisut nalunaarusiaminni allapput.

Isumaqatigiissitsiniarneq isumaqatigiissuteqarluni naammassineqarsimasoq

Sikuki aamma 2021-mi Nuummi nutaamik umiarsualiviliorsimasumut Per Aarsleffimut isumaqatiginninniarnissamut piareersarnermut aningaasarsuuteqarsimavoq. 2021-mi septembarip qaammataani saqqummiunneqarpoq, ingerlatseqatigiiffiit taakku marluk umiarsualivissap kingusinaartumik tunniunneqarnissaa pillugu aaqqiagiinngissuteqarnerminni isumaqatigiissuteqarsimasut.

- Isumaqatigiissitsiniarnermi 2017-imili ingerlanneqartumi isumaqatigiissuteqartoqarmat imatut ulorianartueruppoq, ingerlatseqatigiiffimmiillu ulluinnarni ingerlatsineq aamma Nuummi umiarsualiviup ineriartorteqqinneqarnissaa maanna ukkatarineqarsinnaalerluni, ingerlatseqatigiiffimmi siulersuisut aaqqiagiinngissuteqarsimaneq pillugu allapput.

Ingerlatseqatigiiffimmit suliarineqarsimasut ilaatigut taaneqartut tassaapput Gl. Atlantkaj aamma Tidevandstrappen, Skonnertkaj, Kutterkaj, Feederkaj, kiisalu Sarfaannguani Montagekajen LED-inik nutaanik 49-nik qullilersorneqarsimanerat. Ingerlatseqatigiiffik naapertorlugu qullilersuisimaneaq taartarnerata nalaani isumannaallisaanermik aamma sullivimmi isumannaallisaanermik pitsanngorsaasimavoq.

Siulersuisut nutaamik siulittaasortaartut

Sikuki ilanngullugu allappoq, innaallagissiorfiit angallattakkat iluaqutigalugit umiarsualivimmi innaallagissamik pilersuineq annertusarniarlugu Nukissiorfiit suleqatigineqalersimasut. Taamatut iliuuseqarnikkut umiarsuat umiarsualivimmi talinnganerminni co2-mik aniatitsisarnerat annikillisinneqassaaq.

Ataatsimeersuartoqarmat aamma siulersuisuni allanik taarsiisoqarpoq.

Siulersuisuni siulittaasoq Lars Karlsson ataatsimeersuartoqarnerani siulittaasutut tunuarpoq, Naalakkersuisullu Ujarak Rosing Petersen siulersuisuni ilaasortassatut nutaatut toqqarsimavaat.

Steen Montgomery-Andersen Sikukimi siulittaasunngorpoq. Taanna siulersuisuni maannamut ilaasortaasimavoq, siusinnerusukkullu ukiorpassuarni Tele-Postiusimasumi – ullumikkut Tusassimi aningaasaqarnermut pisortaasimalluni.

Naalakkersuisooqatigiinni isumaqatigiinngissutaasartoq

Sikuki ukioq manna siusinnerusukkut Inuit Ataqatigiit Naleqqallu naalakkersuisooqtigiinnerani isumaqatigiinngissutaasarsimavoq. Naleqqamit ilaatigut piumasarineqarsimavoq, aalisartut atugaat eqqarsaatigalugit aalisartut Sikukimut akiliuteqartinneqartarnerisa atorunnaarsinneqarnissaa.

Attaveqaasersuutinut taamanikkut naalakkersuisuusup Mariane Paviasenip (IA) oqaatigisimavaa, Sikuki Nuuk Harbour A/S-imik atuisunut akiliuteqartitsisarnerup allanngortinneqarnissaanik Naalakkersuisut pilersaaruteqanngitsut.

- Atuisut akiliuteqartinneqartarnerisigut Sikuki Nuuk Harbour A/S-ip ingerlatsinermut, aserfallatsaaliinermut umiarsualiviullu suliarineqarnissaanut taarsigassarsiarineqarsimasunut aningaasartuutit matussuserneqartussaapput, naalakkersuisoq allappoq.

Powered by Labrador CMS