Sikuki sinneqartooruteqarluartoq - Naalakkersuisut siulersuisuni ilaasortat taarserpaat
Suliffeqarfiup talittarfiata Sikuki Nuuk Harbourip 2022-mi sinneqartoorutai akileraarutitaqanngitsumik 17,3 millionit koruuniupput. Siulersuisuni ilaasortat marluk tallimanngornermi ataatsimeersuarnermi taarserneqarput.
Sikuki Nuuk Harbourip Nuummi talittarfik ingerlataraa. Suliffeqarfik 2022-mi akileraarusernagit 17,3 millionit koruuninik sinneqartooruteqarpoq. 2021-mi akileraarusernagit 16,2 millionit koruunit sinneqartoorutigineqarput, siulersuisuillu angusat naammagisimaarpaat.
Sinneqartoorutigineqartut ingerlatsiveqatigiiffiup nammineerluni aningaasaataanut isumannaallisaatitut atorneqassapput, siunissami aningaasaliinissamut piviusunngortitsiniarnermi nukittorsaataasussatut, Sikuki tusagassiuutinut nalunaarummi allappoq.
Sikuki Nuuk Harbour A/S 2022-imi 960-eriarluni aqqusaarfigineqarsimavoq, 2021-imi 910-eriarluni aqqusaarneqarsimalluni. Kilisaatit pajuttaatillu atuisuunerpaallutik.
Kaaviiaartitat amerlisut
Suliffeqarfiup kaaviiaartitai ukiuni kingullerni 3 millionit koruunit missiliorlugit amerleriarsimasut kisitsisit pingaarnerit tabelimi takuneqarsinnaapput.
Naqqiut: Tabelimi siullermi allassimavoq Sikuki 2022-mi arfinilinnik sulisoqartoq. Kisitsit eqqortoq tassaavoq 2022-p naanerani sulisut katillugit qulingiluaasut, Sikuki paasissutissiivoq.
Atuisut akiliutigisartagaat ingerlatsinermut, aserfallatsaaliinermut aamma aserfallatsaaliinermut kinguussaasimanermut aaqqiissutitut atuinnarnagit, ingerlatsiveqatigiiffiup umiarsualiviup allinissaanut pitsanngorsarnissaanullu toqqammavittut aningaasaliinissaq siunertaralugu isumannaallisaaqataasarpoq, Sikuki allappoq.
Siulersuisuni ilaasortat nutaat marluk
Ataatsimeersuarnermi siulersuisuni ilaasortat marluk tikilluaqquneqarput, taakkuullutik Marie-Louise Frederiksen Thomas Bendtsenilu. Thomas Bendtsen Rønnep talittarfiani pisortaanikuuvoq maannalu Packmont Logisticsimi pisortaalluni.
Marie-Louise Frederiksen Nuummi eqqartuussissuserisuuvoq namminersortoq. Taakku marluk Haukur Oskarsson Ivalu Kleistilu paarlappaat siulersuisullu siulittaasuata Steen Montgomery-Andersenip ilaasortaajunnaartut ataatsimeersuarnermi suleqataasimanerinik qujaffigai.
Alliliinissaq sulissutigigaat
COWI suleqatigalugu Qeqertaq Avallermi umiarsualiviup allinissaa pillugu misissuinerit aallartisarneqartut Sikukip ilanngullugu paasissutisiissuutigaa.
- Containerit umiarsualiviat tallineratigut kilisaatit umiarsualivissaannik pilersitsinissamik, misissuinerit aallartisaataasut suliarilluagaasumik aalajangiinissamut toqqammaveqarluartuussapput, taamaaliornikkut illoqarfiup iluani containerinik angallassineq aamma nipituuliorneq annikillineqarsinnaaniassammata, aammattaaq umiarsualivitoqaq umiarsuarnut takornariartaatinut aqqusaartartunut amerliartortunut sullissisinnaatikkumallugu. Naatsorsuutigaarpullu ukiup 2023-p ingerlanerani ingerlatsiveqatigiiffiup siulersuisuinit aamma piginnittuanit tamanna aalajangerneqarsinnaajumaartoq, pisortaaneq John Rasmussen oqarpoq.