Sikuki coronaqaraluartoq kaaviiaartitaqarnerulersoq
Kilisaatinik usigiaanerusalerneq aamma Royal Arctic Linep Eimskipimik suleqateqalersimanera pissutigalugit umiarsualiviliutileqatigiiffik Sikuki Nuuk Harbour 2020-mi kaaviiaartitaqarnerulersimavoq.
2020-mi umiarsuartigut takornarianik tikittoqanngikkaluartoq Namminersorlutik Oqartussat ingerlatseqatigiiffiutaat Sikuki Nuuk Harbour angusaqarluarsimavoq.
Ingerlatseqatigiiffiup kaaviiaartitani 55,2 millioner koruuniniit 57,5 millioner koruuninut amerleriartissimavai. Angusat aamma akileraarutit peereerlugit 7,6 millioner koruuniniit 8,6 millioner koruuninut annertuseriarsimapput.
Ingerlatseqatigiiffik marlunngormat ataatsimeersuarmat tamanna saqqummiunneqarpoq.
Sikuki Nuuk Harbour pillugu
- Sikukip Nuummi umiarsualiveqarfiit pingaarnerit tamaasa pigisarai
aamma Nuummi umiarsualivinni pisortaavoq. - Sikuki niuernikkut imminut akilersinnaasumik umiarsualivinnik ingerlatseqatigiiffiuvoq, tassani atuisut akiliutaat, inissiisarfinnik attartortitsineq sullissinernillu tunisaqarneq ataatsimut tassaapput ingerlatseqatigiiffiup isertitaanut
tunngaviusut, ilaatigut aserfallatsaaliuinerup ingerlanneqarneranut atorneqartussat. - Umiarsualivik inissiisarfiuteqarpoq, suliffeqarfinnut ingerlatanut, toqqorsinermut aamma ineriartortitsinermut inissamik pisariaqartitsisunut attartortinneqartartunik.
- Umiarsualivitoqaq pingaarnertut kilisaatinut, tunisinernut, takornariaqarnermut aamma Issittumik Sakkutooqatigiinnut qitiuvoq.
- Royal Arctic Line, tassaasoq ingerlatseqatigiiffiup sullissaasa annersaat,
Qeqertanut inissisimasumi containerit aallarartinneqartarfiat
tikiunneqartarfiallu nutaaq 2017-imi aggustusip qaammataani suliaralugu naammassineqarmat attartorpaat.
Pissarsiffik: Ingerlatseqatigiiffiup ukiumoortumik nalunaarusiaa
- Kilisaatinik usigiaasarnermit Royal Arctic Linellu Eimskipimik suleqateqarnernerata malitsigisaanik suliaqarnerulernermit kaaviiaartitaqarnerulersimanerup 2020-mi umiarsuartigut takornariat tikinnissaminnik taamaatitsiinnartarnerannit sineriammullu qanittumi aalisartut tunisakinnerusimanerannit kaaviiaartitaqarsimannginneq matussuserpaa, Sikukimi pisortaaneq John Rasmussen ataatsimeersuarnermi nassuiaavoq.
Siulersuisuni siulittaasup Lars Karlssonip nalunaarummi aamma oqaatigaa, naatsorsuutit 2017-imi umiarsualivimmik tunniussinissamik kinguaattoorneq pillugu sanasumut Per Aarsleffimut saqitsaassutigisamik eqqartuussivimmi suliaqartitsinissamut aningaasanik immikkoortitsisariaqarsimanermit sunnerneqarsimasut.
Sikukip Per Aarsleff A/S-illu isumaqatiissutaat naapertorlugu, containerinut terminaleqarfik umiarsualiviullu allilerneqarnera 2016-imi novembarip qaammataani naammassereerneqartussaagaluarput, sanasorli kinguaattoorsimavoq.
Sikuki kingusinaartumik tunniussisoqarneranut akiliuteqaqqusisimavoq, sanasorli aappaatigut piffissap tunniussiffissap kinguartinneqarnissaanik immikkullu akiliuteqartoqarnissaanik piumasaqarsimalluni. Saqitsaassutigisaq eqqartuussivimmi aalajangiiffigineqassaaq.
Siulersuisut ataatsimeersuarnermi atuutiinnartussanngorlutik qinigaaqqipput, Lars Karlssonilu siulittaasutut 2013-mi ingerlatseqatigiiffik pilersinneqarmalli atuuffigisani ingerlatiinnarlugu. Siulersuisuni ilaasortat allat tassaapput Haukur Oskarsson, Heidi Ane-Marie Jakobsen Jeremiassen, Ivalu Kleist aamma Steen Smed Montgomery-Andersen.