Skip to main content

Sikuki Aatsitassanik Uninngatitsiviliornissaq pillugu: Iluatsitsinerput ajoquserneqassaaq

Namminersorlutik Oqartussat ingerlatseqatigiiffiutaata Sikuki Nuuk Harbourip akerlerilluinnarpaa, Aqqartartut suliffeqarfiutaata Maliup Nuummi Pinerluuteqarsimasunut inissiisarfiup avannaata tungaani nammineq talittarfilimmik aatsitassanik uninngatitsiviliorniarnera.

Aqqartartut suliffeqarfiutaa Malik Nuup avannaata tungaani talittarfilimmik aatsitassanik uninngatitsiviliornissaq anguniarlugu qinnuteqarsimavoq. Pilersaarut Sikuki Nuuk Harbourimit akerlilerneqarsimasoq, tusarniaanermi Kommuneqarfik Sermersuumut akissuteqaammi atuarneqarsinnaavoq.

Sikuki Nuuk Harbour isumaqarpoq, Aqqartartut suliffeqarfiutaa Malik Sikukip susinnaanngisaanik aatsitassanut uninngatitsiviliornissamut akuerineqassappat, iluatsitsiffiusumik ingerlatsinertik ulorianartorsiortinneqarlunilu ajoquserneqassasoq.

Tusarniaanermut akissummut atatillugu kommunimi ingerlatsiviup allakkiaani allassimavoq:

- SIKUKI-mit erseqqissaassutigineqarpoq, SIKUKI-p sananeqarnerani siunertaasoq ”umiarsualivimmik ataatsimik pilersitsinissaq aamma Nuummut Kalaallillu Nunaannut isertarfimmik ataatsimik pilersitsinissaq [...] Taamatut ingerlatsinissamik aaqqissuussaq iluatsinneqassappat, tamanna ilutsinniit ajoquserneqassanngilaq.”

Allakkiami aamma allassimavoq, SIKUKi-mit isumaqartoqartoq suliniut Umiarsualiviit pillugit Inatsisartut inatsisaannut nr. 9, 3. juni 2015-imeersumut akerliusoq.

Umiarsualiviit pillugit inatsit pineqartumut attuumassuteqanngitsoq

Kommuneqarfik Sermersooq aatsitassanut attaveqaatinullu naalakkersuisoqarfimmi inatsisitigut ilisimatinneqarnissammik qinnuteqarsimavoq.

- Ilisimatitsissummi allassimavoq, suliniut aatsitassanut inatsimmut attuumassuteqarsinnaasoq, taamalu umiarsualiviit pillugit inatsimmut attuumassuteqarani, ingerlatsivik Sikukimit maalaarummut atatillugu inerniliivoq.

Attaveqaatinut naalakkersuisoqarfik aamma tusarniaanermut akissuteqarsimavoq, tassanilu allassimalluni, ”aatsitassanut uninngatitsivissap umiarsualiviup atuutereersup eqqaanut inissinneqarnissaa isumatusaarnerullunilu inuiaqatigiit eqqarsaatigalugit naleqqunnerussaaq”.

Suliniut kommunimi tusarnissaasutigineqarmat akissuteqaatit qulingiluaasimapput, akissuteqaatinili akerliullutik allagaqarsimasut allannguinissamut tunngavissiisimanngillat, Sanarfinermut Avatangiisinullu Ingerlatsivimmit ilisimatitsissutigineqarpoq.

Illutamut ajoqusiisinnaanera ernummatigineqartoq

Pinerluuteqarsimasunik Isumagittoqqarfimmit, aatsitassanik uninngatitsivissamut qaninnerpaami inissisimasumit ernummatigineqarpoq, aatsitassanut uninngatitsivissaq pinerluuteqarsimasunut inissiisarfiup illuataanik ajoqusiisinnaanera, tusarniaanermullu akissummi, assersuutigalugu isumannaallisaanermi atortunik assiliivinnillu ajoqusiisoqassappat taarsiiffigitinnissaq piumasaqaataasinnaasoq allassimavoq.

Kalaallit Airportip tusarniaanermut akissummi eqqumaffigeqquaa ”mittarfiup eqqaani qammaqqutilersuinerit timmisartut isumannaassusaannut mittarfimmillu ingerlatsinermut ulorianartorsiortitsinnginnissaat”.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER