Siku qajannarluinnarpoq: Avannaata Qimussersua nuutsinneqarpoq

Avannaata Qimussersua Uummannami ingerlanneqartussaajunnaarpoq. Unammersuarnermulli anngunniuttussat, maanna illoqarfimmi kujasinnerusumi unammersuartussanngorput. Tassa Sisimiuni.

Kalaallit Nunaanni Qimussertartut Kattuffiat, KNQK, aalajangerpaa Uummannami sikup nungukkaluttuinnarnera pissutaalluni, Avannaata Qimussersua Sisimiuni ingerlanneqaannassasoq.

- Naluneqanngitsutut Avannaata Qimussersua pinngortitap aalajangiineratigut Uummannamiissinnaajunnaarpoq. Tamanna qassiiliornaannarani uggornaqaaq. KNQK-mi siulersuisuunerit ullaassaq aalajangerput Avannaata Qimussersua ukioq manna Sisimiuni ingerlanneqassasoq, ullui nikisinnagit, KNQK sinnerlugu siulittaasoq Mikkel Jerimiassen uppernarsaavoq.

Sikuertoq

Mikkel Jeremiassenip erseqqissarpaa siulersuisuunerit piareersaatinik maanna ulapputeqartut. Aalajangernermut tunngavilersuutigineqarput tusarniaanerit, neqeroorutit, nalilersuinerit pissutsinillu qulaajaanerit Sisimiuni aamma Ilulissani. Taakku periarfissatut tusarniarfigineqarsimapput, Uummanna sikuerluinnalermat.

Avannaata Qimussersua 1. april ingerlanneqassaaq. Qimussit 40-t 40 kilometerimik takisssusilimmut unammersuassapput.

Avannaata Qimussersua ukioq manna ukiunik 35-nngortorsiorpoq. Tamanna Uummannami, unammersuarneq siullerpaamik ingerlanneqarmat aallartiffiusimasumi, ingerlanneqartussaagaluarpoq. Pinngortitarli pissutigalugu tamanna maanna pisinnaanngilaq. Uummannami anorersuareertorlu Uummannaq sullua imarorpoq, sulilu iluamik sikoqqigani.