Siku Cross sikukkut halv maratonertitsinissamik aaqqissuivoq
Nunatsinni nunanilu allani arpattartut arpaffimmik unammillernarnerulaartumik misiliinissamut periarfissaqalerput. Qaarsuniimmi Uummannap tungaanut sikikkut arpatsitsinissamik pilersaarusiortoqarpoq.
Uummannap sullua nunatsinni sikukkut halv maratonimik arpannermi siullermi misiliiffiusussanngorpoq. Arpannissaq 8. april 2023 pissasoq pilersaarutigineqarpoq.
Nunatsinni nunanilu allani takisuumut arpattartut sikukkut halv maratonimik arpallutik misiliisinnaalerput. Qaarsuniit Uummannamut arpannissaq pilersaarutigineqarluni.
Aaqqissuussaq nunatsinni siullersaasoq, Visit Greenland nittartakkamini allappoq.
- Ice-Half Marathon, halv maratonimik sikukkut arpatsitsinissaq nunatsinni siullersaavoq. Qaarsuniit Uummannap tungaanut arpattoqassaaq, Visit Greenland allappoq.
Timersornermik aallussititsisoq aaqqissuisoq
Peqatigiiffik Siku Cross, Uummannamiittoq aaqqissuisuuvoq.
Uummannami anorlersimaneranit siku kaanngartiterluni maanna imaroriartorpoq. Aaqqissuinermilli ingerlatsisoq, Anguteeraq Grønvold ilisimatitsivoq Uummannamiit Qaarsut tungaanut siku suli isumannanngitsoq.
- Arlalinnik pilersaarutinik sillimmateqarpugut. Qaarsut tungaanut siku ajussagaluarpat, arpaffiusinnaasut allat aamma sillimaffigaagut, Anguteeraq Grønvold Siku Crossimik ingerlatsisoq nassuiaavoq.
Peqatigiiffik Uummannami timersornerulernissamik suliniuteqarpoq, aasarlu triatlonimik taallugu aamma timersortitseqqammerluni. Peqataasut qaannamik, sikkilinik arpallutillu peqataapput.
Siku Cross sikukkut halv maratonertitsilerpat arpannermi takissutsit naannerit peqataaffiginissai aamma periarfissaavoq.
- Arpatsitsineq pilersaarutit malillugit 8. april 2023 ingerlanneqassaaq. Sila sikullu qanoq issusaat apeqqutaallutik ulloq allanngorsinnaavoq, Visit Greenland oqarpoq.
Halv maratonernissamut inuit 20-t tungaannut peqataassallutik nalunaareersimapput. Nalunaartut affaat Uummannameersuupput eqqaaneersuullutilluunniit, sinneri nunatta sinneranit nunaniillu allanit peqataajartussallutik nalunaarsimapput.