SIK: Politikerit suliatsinnik tigusiniarpat?
SIK akissarsianut tunngatillugu aqagumiit isumaqatiginninniartussanngorpoq. Politikerilli sulisoqatigiit aalajangersimasuinnaat atugaannut tunngatillugu politikkikkut akuliuttarnerat ilungersunartutut, SIK-p siulittaasuanit isigineqarpoq.
Sulisoqatigiiaat aalajangersimasut atugaannut politikerit akuliuttarneri SIK-mit ilungersunartutut isigineqarpoq, sulisoqatigiiaammi ataasiinnanngitsut, kisiannili ilaasortat tamakkerlugit atugaannik pitsanngorsaanissamut kattuffik isumaqatiginninniarnermut pisussaavoq.
SIK-p siulittaasua Jess G. Berthelsen taama isumaqarpoq, aqagulu 16. november isumaqatiginninniarnerit aallartissasut oqaatigalugu.
- Kattuffiit taava sumut atussagamik, politikerit sulisunut aalajangersimasunut pitsanngorsaassallutik akuliuttarniarpata, aperivoq nangillunilu:
- Soorlu massakkorpiaq portørit atugaat immikkut maluginiarneqarput. Taamaattoqarnerani uagut tatisimaneqangaatsiarpugut, uagummi isumaqatiginninniarnernik ingerlatsisussaagatta, Sermitsiaq.AG-mut oqarpoq.
Taanna tusagassiorfinnut nalunaarutimini apeqquteqarpoq politikerit isumaqatiginninniarnernik ingerlatsilerusunnersut, akissarsiallu qaffaatissaat aningaasanut inatsisissamut ilanngunneqartalissanersut ilanngullugu apeqqutigalugu.
- Kattuffimmi siulittaasutut isumaqatiginninniarnernut akisussaaffik ipararusuppiuk?
- Naamik, tamanna kissaatiginngilara. Politikerilli akuliuttarnerat ilungersunartuuvoq. Uagummi sulisut sorliit qanoq atugaqarneri pillugit ilisimasaqartuuvugut, takusinnaallugulu kikkut kinguussaanersut kikkullu pitsanngorsaaffigineqarnissamik pisariaqartitsinersut. Apeqqutaaginnalerpoq sulisut akissarsiaasa qaffaatissaannik aningaasanut inatsimmut ukiut tamaasa immikkoortitsisoqartalissanersoq, oqarpoq.
Inulerisummi?
Perorsaasut sulinermi atugaat akissarsiaallu aamma sammineqangaatsiarsimapput, pitsanngorsarneqarnissaannullu politikerit aamma noqqaassuteqarnikuusimallutik.
Jess G. Berthelsenip erseqqissarpaa meeqqerivinni sulisut allat aamma pingaaruteqarluinnartumik inissisimasut.
- Meeqqerivinni inulerisunik ikiortinillu aamma sulisoqarpoq. Taakku aamma meeqqerivinni pisariaqartinneqarput. Soorlu aamma utoqqaat illuini sulisussanik amigaateqartoqarpoq. Taakkumi? Taakku akissarsiatigut aamma pitsanngorsaavigineqarnissamik pisariaqartitsipput, Jess G. Berthelsen oqarpoq.
Oqaaseqaatimini allappoq utoqqaat illuini sulisut meeqqerivinnilu sulisut SIK-p ataani akissarsiaqartinneqartut akissarsiatigut aamma pitsanngorsaavigineqartariaqartut, suliffiit taakku amigaateqartuarmata.
- Sulisut ataasiinnaat sammissagaanni ilaasortatsinnik immikkoortitsineruvoq. Tamanna inissaminiinngilaq. Ilaasortatta arlallit pitsanngorsaaviginissaat inissaminiinneruvoq, Sermitsiaq.AG-mut oqarpoq.